Qazaqtyń bir týar uly, kemeńger aqyn Abaı Qunanbaıulynyń balalyq shaǵy 104 serıaly 3D formatyndaǵy anımasıalyq fılmge arqaý bolmaq, - dep habarlaıdy «Qamshy» portaly. Bul týraly joba prodúseri, «Abaı joly» kompanıasynyń prezıdenti Ǵusyman Qajytaıuly aıtyp berdi.

QHR Úrimji qalasynda ornalasqan «Abaı joly» kompanıasy osy jobamen 2 jyldan beri aınalysyp jatqan kórinedi. Ǵ. Qajytaıuly ýaqyttyń kóp bóligi daıyndyq jumystaryna, senarı men pysyqtaý jumystaryna ketkenin aıtady.

«Alǵash ret aınalysyp jatqan joba bolǵandyqtan eki jyldaı ýaqyt alǵashqy eki serıany ázirleý men senarıdi pysyqtaýǵa ketti. Fılm senarıin qazaqstandyq senarıster, Jaılybaı Janat, Halıolla Ramazan, Baqytjan Quljabaıuly men Qytaıdaǵy qandasymyz Qasıet Saqıolla jazyp jatyr. Senarı, beıneleý jumystaryna aqyl-keńes beretin keńesshilerimiz bar. Mádenıet, dástúr máselesinde etnograftardyń kómegine júginemiz», - deıdi Ǵusyman Qajytaıuly.

Joba prodúseriniń aıtýynsha, anımasıalyq fılm serıalary kezeń-kezeńmen ázirlenbek. Bıylǵy jyly jobanyń 15-20 serıasyn tamamdaý josparlanýda.

«Jobadaǵy negizgi maqsat – sapaǵa mán berý. Bul fılm keıingi qazaq anımasıalyq fılmderine úlgi bolatyn, 3D formatyndaǵy anımasıalyq fılmderdi ázirleýdiń standartyna aınalýy tıis. Osy sebepterge baılanysty biz daıyndyq, pysyqtaý jumystaryna kóp aınaldyq. Árbir qımyl, sekýndttyq qozǵalystary beıneleýge qyrýar eńbek ketetinin bilesizder. Endigi kezeńde birshama qarqyndy jumys isteımiz dep otyrmyz. Jyl sońyna deıin 15-20 serıany daıyndaý oıymyzda bar», - deıdi Ǵ. Qajytaıuly.

Kóp serıaly anımasıalyq jobaǵa Abaı Qunanbaıulynyń balalyq shaǵy, dana Abaıdyń bala beınesi arqaý bolmaq. Kórermenderdi bala Abaıdyń aqyldylyǵy, tapqyrlyǵy men sheshendigi arqyly tárbıeleý, fılm barysynda qandaı da qıyndyqtardan erekshe aqyldylyǵy men tapqyrlyǵy arqasynda jol taba biletin Abaıdy úlgi etý – basty maqsat.

«Abaıdy bilmeıtin qazaq joq. Osy kúnge deıin biz «Abaı joly» bastaǵan shyǵarmalar arqyly aqynymyzdyń bozbala shaǵy, ómiriniń aqyl toqtatqan, tolysqan, el aǵasy bolǵan kezeńderimen tanyssaq, myna anımasıalyq jobada Abaıdyń 8 jasqa deıingi ómiri sýretteledi. «Abaı jolynda» atalatyn keıipkerler men dana aqynymyzdyń týystarynyń, dostary men jaqyndarynyń attary, jer-sý ataýlary ózgertilmeıdi. Barlyǵy sol kúıinde saqtalady», - degen joba jetekshisi anımasıalyq fılm tıimdi tárbıe quraly ǵana emes, birneshe tilge aýdarylyp, úlken tabys kózine aınalatynyna da senimdi.

«Eger osy jobany birneshe tilge aýdaryp, Astanamyzda ótetin EKSPO-2017 kórmesine usynsaq úlken oqıǵa bolǵan bolar edi. Álem qazaqty munaı men metaldan, gaz ben kómirdeg basqa, taǵy bir qyrynan tanylar edi», - degen Ǵ. Qajytaıuly anımasıalyq fılmdi jaqyn bolashaqta Qytaıdyń eń iri CCTV telekompanıasynyń balalar arnasynan kórsetýge ázirlik jasap jatqandaryn aıtty. Anımasıalyq fılmniń sapasy men tehnıkalyq sıpattamalary telearnanyń qoıatyn negizgi talaptaryna tolyqtaı saı keledi eken. Qytaıda CCTV-dan basqa qanshama telearna baryn eskersek, bul bastamanyń bolashaǵynyń zor ekenin paıymdaý qıyn emes. Osylaısha anımasıalyq fılmniń ázir bolǵan alǵashqy 20 serıasyn bir ýaqytta birneshe elde kórsetýdi maqsat etip otyr joba avtorlary.

Qytaıda júrip qazaq rýhanıatyna qamqorlyq tanytyp júrgen Ǵusyman Qajytaıuly Qazaqstanmen baılanys máselesine de erekshe mán berý kerek dep sanaıdy. Almaty kásipkerler qaýymdastyǵy uıymdastyrǵan basqosýǵa arnaıy kelgen ol qazaqstandyq fılmderdiń prokatyna qatysty da tyń oılarymen bólisti. Onyń aıtýynsha, qazaq kınogerleri túsirgen fılmderdi shet tilderine aýdaryp, halyqaralyq prokatqa shyǵarýdy qolǵa alý kerek. Bul iste Qytaı naryǵyna erkin kirip, mádenı ónimderdi saýdalaýǵa bolatynyn aıtyp otyr.

«Qytaıda mádenı ónimderdiń naryǵy úlken. Álemniń kóptegen elderi aınalasyna kınosymen, múltfılmderimen, basqa da mádenı ónimderimen tanylýda. Tanylyp qana qoımaı paıdaǵa kenelýde. Biz de qazirgideı mádenıet tutynýshy qalpymyzda qalmaı, mádenıet taratýshy elge aınalýdy maqsat etýimiz qajet», - deıdi Ǵusyman Qajytaıuly.

Prodúserdiń buǵan deıin saýda, ekonomıkalyq salada baılanys ornatyp, tek shıkizat pen taýar tasymalyn ǵana júzege asyryp kelgen Qazaqstan men Qytaı arasynda jaqyn bolashaqta mádenı baılanystardyń da jańa beleske shyǵaryna senimi zor. Qos tarap ta osy maqsatta birlese jumys isteýge múddeli dep otyr.

Darhan Muqantegi