Reseı sarbazdary Qyrymnyń áskerı bólimshelerin jaýlap jatyr. Ýkraınanyń buqaralyq aqparat quraldary habarlaǵandaı, dúısenbi kúni olar Tarhankýtta ornalasqan áýe kúshteriniń radıolokasıalyq rotasyn jaýlap alýǵa áreketengen, dep habarlaıdy Tengrinews.kz tilshisi.

Atalǵan qurylym komandıriniń orynbasary Vıtalıı Onıshenkonyń sózine qaraǵanda, naýryzdyń 10-y kúni keshqurym áskerı bólimsheniń tosqaýly janynda memlekettik nómiri joq segiz júk mashınasy toqtady. Sodan 120 reseılik desant túsip, áskerı qalashyqty qorshaýǵa aldy. Al bólimsheniń jeke quramyna qarý-jaraqty tapsyryp, óz erkimen berilýge usynys jasaldy. Radıolokasıalyq rotanyń komandıri oǵan moıynsunǵan joq. Budan keıin kelissózder bastaldy.

Sondaı-aq dúısenbi kúni túnde shamamen 200 reseılik sarbaz 14 júk mashınasymen kelip, Chernomorsk kentinde ornalasqan zymyran-tehnıkalyq bólimsheni jaýlap aldy. Bul týraly Qyrymnyń qorǵanys mınıstrligi medıa-ortalyǵynyń basshysy Vladıslav Seleznev Feısbýktaǵy óziniń jeke paraqshasyna jazdy.

Budan basqa, Bahchısaraıdaǵy áskerı bólimshe reseılik sarbazdardyń ıeligine ótti. Qazir olar Novofedorovka aerodromyn jaýlap alýǵa tyrysyp jatyr. Buǵan deıin Sakah jáne Djankoe aerodromdary baǵyndyrylǵan bolatyn. Al, Belbek aerodromynyń jumysy toqtatyldy.