Astana qalasy ákimdiginiń Jastar teatry ústimizdegi jyldyń naýryz aıynyń 13-19 kúnderi aralyǵynda Ulystyń Uly kúni áz-Naýryz merekesine oraı S.Qasymbektiń "Naýryz arý" atty erteginiń premerasyn balalarǵa kóktemgi bazarlyq retinde tartý etpek. Qoıylymnyń qoıýshy rejıseri Bekbolat Qurmanǵojaev. Rejıseri Ásem Qýanyshbaeva. Qoıýshy sýretshi Dana Ermekbaeva.

Naýryz - jyldyń basy, kún men túnniń teńeler shaǵy. Tarıhı tamyryn tereńnen tartqan osynaý meıram bereke men birliktiń, tazalyq pen tatýlyqtyń tuǵyryn nyǵaıtyp, rıasyz shattyq pen qýanyshqa kenelter- uly mereke. 

         Kóktemniń osy bir shaǵynda tabıǵat qana túlep qoımaı, qoǵamnyń yntymaǵy men birligin, beıbitshiligi men túsinistigin nyǵaıtatyn, adam balasynyń da jan-dúnıesi jańǵyra túsetin kóktemniń jarqyn merekesin keńinen atap ótýge, ulttyq dástúrdi dáripteý maqsatynda Jastar teatry ujymy osy ertegi arqyly óz úlesin qosýda.  

         Tirshiliktiń qaıta jandanýy, tabıǵattyń gúldenýi Naýryzdyń kelgenin bildiredi. Ushqan qus, jorǵalaǵan jándik, júgirgen jan-janýar, baıandy tirshilik etken adamzat jyl mezgili kóktemdi erekshe asyǵa kútetini aqıqat. Avtor Saıa Qasymbektiń ıdeıasy osyny meńzeıdi.

         Oqıǵa jelisinde tirshiligimizge óz kezegimen keletin jaıma shýaq kún sáýlesin tógip, búkil tirshilik ataýlysyn uıqydan oıatyp, jasyl-jelekti boıaýǵa toly kórikti kóktem jer betin aq qar basqan aıazdy qys mezgilin yǵystyryp ótedi. Boran men sulý da kórikti Naýryz arýy tirshiliktegi óz oryndary úshin talasady.  

         Ertegi búldirshin kórermenderimizge tabıǵat ananyń Kún, Boran, Naýryz arý syndy keıipkerleri arqyly kórkemdik tanym turǵysynda ulttyq dástúrimizdi, jyl basy Naýryzdy, jańa jylqy jylynyń engenin aıshyqty baıandaıdy.

         Avtor jyl mezgili kóktemniń, jańa jyldyń kelýin tabıǵatpen baılanystyrady.  Bul ertegi kórkemdik jaǵynan da, tanymdyq turǵysynan da ulystyń uly kúni Naýryzdy, jańa jyldyń kelýin nasıhattaıdy.

Sondaı-aq teatr ujymy 16 naýryz kúni saǵat 11.00-de Astana qalasyndaǵy balalar úıi men turmystyq jaǵdaıy shekteýli otbasylardyń balalaryna atalǵan ertegini qaıyrymdylyq retinde tegin kórsetpek.

Ótetin ýaqyty: Naýryz aıynyń 13, 14, 15, 16, 18, 19 kúnderi saǵat 11.00-de.  

Teatrdyń meken-jaıy: B.Momyshuly 5, Oqýshylar saraıy ǵımaraty.

Baılanys tel: 701-218, 701-258.

Kasa 701-216