"El arna" telearnasy jabylyp, al oǵan jyl saıyn bólinip otyrǵan 2 mıllıard teńge basqa jobalarǵa jumsalady, - dep habarlaıdy Tengrinews.kz tilshisi QR Ekonomıka jáne búdjettik josparlaý mınıstri Erbolat Dosaevqa silteme jasap.

Parlament májilisinde 2014 jylǵy respýblıkalyq búdjetke ózgerister engizý talqylanǵanda, depýtattar E.Dosaevtan "El arna" telearnasynyń nelikten jabylatyndyǵyn, al eger jabylsa, nege oǵan qaıtadan aqsha bólinetindigin surady. "Bir jaǵynan, biz jyl saıyn 2 mıllıard teńge bólemiz, al reıtıńter arqyly bul arna 300 mıllıon teńge jınaıdy. Ekinshi jaǵynan, Qazaqstan Prezıdenti qazan aıynda tek sapaly jáne qajetti kontentti telearnalardy qaldyrý jóninde tapsyrma berdi. Búginde "El arna" telearnasy kontentteriniń (ónimderiniń) jartysy satyp alynǵan nemese aýdarylǵan, al ózderiniki az, – dedi mınıstr. "Osy "El arna" telearnasyna bólinetin eki mıllıard teńgeniń jartysyn biz "24.kz" arnasyna beremiz, shet elderde aımaqtyq jańa tilshiler qosyny ashylady. Buǵan mıllıard teńge jumsalady. Al 992 mıllıon teńgeni eki jańa fılm túsirýge bólemiz, – dep túsindirdi ol. Depýtattar tarapynan is júzinde "El arna" telearnasynyń reıtıńi tómen emes degen pikirler aıtyldy. Májilismender bul arnany negizinen qazaq tildi kórermender kóretindigin basa aıtty. Depýtattardyń pikirinshe, reıtıńterde tek qala turǵyndarynyń pikirleri esepke alynǵan, bul turǵyda aýyl turǵyndarynyń da pikirlerin bilgen durys. Sondaı-aq, Parlamenttegiler Úkimet kerisinshe otandyq arnalardyń sanyn kóbeıtý kerek ekendigine kóńil aýdardy. Osylaı ishki aqparattyq qaýipsizdikti kúsheıtýge bolatyndyǵy da aıtyldy. Depýtattar qazirgi ýaqytta qazaqstandyqtar shet elderdegi jaǵdaılardy kóbinese basqa memleketterdiń arnalary arqyly biletindigin tilge tıek etti. Esterińizge sala keteıik, byltyr Nursultan Nazarbaev QR Mádenıet jáne aqparat mınıstrine sany kóp memlekettik BAQ salasyn retke keltirýdi tapsyrǵan bolatyn. "Sizder qomaqty qarjy jumsap otyrsyzdar ǵoı! Memleket eshqashan BAQ úshin osynsha aqsha bólmegen. Búdjeti qaralǵanda qaıda qaraıdy? "Bilim" men "Mádenıet" – meniń túsinigimde naqty bir arna. Osy arnalardy qarasań – kontent joq, taba almaıdy. Saýsaqtan sorady. Haıýanattar dúnıesin jáne qaıdaǵy tarıhı fılmderdi kórsetedi. Boldy. Bul arnalardyń árqaısysynda qanshama adam jumys isteıdi, al shyǵarmashylyq joq. CaspioNet qazir "Kazakh TV" dep ataldy, taǵy da "24.kz" paıda boldy. Bulardyń bári Qazaqstanda da, álemde de kórsetiletin bir arna emes pe? Sapaly jumys jasaǵannyń ornyna, biz túsiniksiz birdeńeler jasaımyz, aqshany shashamyz, – degen bolatyn sonda Prezıdent. Tengrinews.kz