Keshe qazaqstandyq birqatar aqparat quraldary 2012 jyly atyshýly «Arqankergen» oqıǵasy boıynsha basty qylmysker Vladıslav Chelahtyń ata-anasy men basqa da otbasy músheleri úılerin satyp, Qazaqstannan kóshkeli jatqanyn habarlady.
BAQ-tyń habarlaýynsha Chelahtyń otbasy kóshýge saqadaı-saı otyrǵan kórinedi. Reseıdiń otandastar baǵdarlamasy boıynsha kóshi-qon qujattary da daıyn kórinedi. Tek Qaraǵandydaǵy úılerin satyp, aqshasyn qaltaǵa basý ǵana qalǵan. Aqparat quraldary da Chelah otbasynyń kóshkeli jatqanyn onyń shekarashynyń ata-anasy turatyn úıdiń satylatyny týraly qulaqtandyrýdan bilgen.
Al, Vladıslavtyń anasy Svetlana Vashenko elden kóshýine mundaǵy zańnyń ádiletsizdigi, sonyń saldarynan ulynyń sottalýy sebep boldy dep otyr.
«Men bul elde endi turǵym kelmeıdi. Ulymdy ádiletsiz sottap jiberdi. Bizdiń dostarymyzdyń barlyǵy ana jaqqa kóship ketti baıaǵyda. Olar úkim shyqqan soń kóshe bastady. Oǵan deıin kóshý týraly oı eshkimde bolmaǵan. Ózderiniń balalary da osyndaı jaǵdaıǵa tap bolýynan qoryqty», - degen Svetlana Vashenko.
Alaıda, elden ketkenmen ulyna kelip turatyndaryn, oǵan múmkindikteri baryn aıtqan.
«Biz Vladqa burynǵydaı kezdesýge baryp turamyz. Bizge jylyna tórt ret kezdesýge ruqsat beredi. Sońǵy ret jeltoqsan aıynda bardym. Ájesi de jaqynda baryp keldi. Bizge ony túrmede kórý aýyrǵa soǵady», - degen S. Vashenko túzeý mekemesindegi ulymen jolyǵýda qandaı da bir kedergilerdiń joqtyǵyn alǵa tartady.
Onyń aıtýynsha, qazir Chelah otbasyn Qazaqstanda ustap turǵan bir ǵana sebep – 30-35 myń AQSH dollaryna baǵalap otyrǵan páterlerin satý máselesi.
Al, osy taqyrypta áleýmettik jeliler men aqparat quraldaryndaǵy jarıalanymdarda pikir bildirýshilerdiń oılary bir jerden shyqpaı otyr.
Jeli qoldanýshylardyń biri V. Chelahtyń isti bolýyna tutastaı memlekettik júıeni aıyptap, joǵary basshylyqta otyrǵandar kináli dese, biri eldi tastap, Reseıge kóshkeli jatqan shekarashynyń otbasynyń áreketin teris kóredi. Tipti, pikir bildirýshilerdiń ishinde «Chelah bálkim túrmede emes, elden jasyryn shyǵarylyp jiberilgen shyǵar. Mynalar sonyń artynan kóshkeli otyrǵan bolar» deıtinder de tabylǵan.
Esterińizge salsaq, qazaq-qytaı shekarasyndaǵy «Arqankergen» shekara beketinde 2012 jylǵy 27 mamyrda 14 shekarashy men shekara beketi ornalasqan jerdegi ormanshyny atyp tastady, qyzmet ornyn tastap ketti, áskerı múlikti búldirdi degen birneshe aıyp taǵylǵan shekara qyzmetiniń merzimdi qyzmettegi sarbazy Vladıslav Chelah sol jyly 11 jeltoqsanda áskerı sot úkimimen ómir boıy bas bostandyǵynan aıyrý jazasyna kesilgen bolatyn. Sol kezde aqparat quraldary ol jazasyn el arasynda «Qara búrkit» atalyp ketken Qostanaı oblysyndaǵy erekshe rejımdegi 161/3 túzeý mekemesinde óteıdi dep habarlady.
