Astanada 11 jasar eki oqýshy Esil ózeninde muz astyna túsip ketti, dep habarlaıdy elordalyq TJ departamentiniń baspasóz qyzmeti. Qutqarýshylardyń aıtýynsha, 5 synyp oqıtyn oqýshylar jattyǵý aıaqtalysymen Alataý sport kesheninen shyǵyp, ózenniń ústimen joldy kesip ótpek bolǵan. Sol kezde juqa muz shytynap, eki bala ózen sýyna qulap ketken. Qýanyshqa oraı, qaıǵyly oqıǵany aldyn alýǵa múmkin boldy. Sport keshenine baǵyt alyp kele jatqan M. Beısov pen D. Musa-Namaz esimdi eki polıseı balalardyń sýǵa ketip bara jatqanyn kórip, qutqaryp aldy. Jedel járdem shaqyrtylǵannan keıin, dárigerler balalardy aýrýhanaǵa qosymsha tekseristen ótkizý úshin alyp ketti. Qutqarýshylar muzdyń ústine shyqpaýǵa jáne balalaryn jiti baqylaýda ustap otyrýdy suraıdy.