Jeksenbi kúni keshte elordadaǵy «Qazaqstan» konsert zalynda tórtinshi ret «Qazaq arýy-2014» respýblıkalyq sulýlyq baıqaýy ótti.
Eldiń eń ádemi arýy ataǵy úshin 21 úmitker synǵa tústi. Qatysýshylardyń barlyǵy da ádemi jáne talantty bolýymen qatar halqymyzdyń dástúrlerin, tarıhy men mádenıetin jaqsy biletinin jáne ardaq tutatynyn baıqatty.
Baıqaý birneshe kezeńnen turdy - qazaqstandyq dızaınerlerdiń qolynan shyqqan kıimderdiń sán baıqaýy, shyǵarmashylyq jáne zıatkerlik áleýetteri syn tezinen ótti.
Alǵashqy baıqaý kezeńinen keıin úmitkerler sahnada ustaý mádeıetin kórsetip qana qoımaı, ózderiniń qabilet-qarymyn pash etti, máńgilik qundylyqtar jónindegi paıym-túsinikterin ortaǵa saldy, dombyra men qobyzdyń jáne jetigenniń áýenimen qazaqtyń belgili poezıa padıshasy Muqaǵalı Maqataevtyń sózine jazylǵan ánder áýeledi, operalyq shyǵarmalar, tanymal estradalyq ánder oryndalyp, bı saltanaty kórermenderdi baýrap aldy.
Astanadan báıgege qosylǵan Gúlmaral Qajyhan jas dombyrashy Nurjan Tashqymbaevtyń súıemeldeýimen sahnaǵa búrkitti alyp shyqty. Sondaı-aq baıqaýǵa qatysýshylardyń akterlik sheberlikteri de kórermenderdi beı-jaı qaldyrǵan joq.
Bıylǵy jyly baıqaýdyń qazylar alqasynda belgili telejúrgizýshi Aıgúl Múkeı, otandyq opera prımasy Nurjamal Úsenbaeva, dızaıner Aıda Qaýmenova, teatr jáne kıno akteri Ǵanı Quljanov, aıtys aqyny Aınur Tursynbaeva, L.Gýmılev atyndaǵy Eýrazıa ulttyq ýnıversıtetiniń rektory Erlan Sydyqov, «Habar» telearnasynyń baǵdarlamalar óndirisi dıreksıasynyń bas prodúseri Rınat Kertaev, Astana qalasy mádenıet departamentiniń bastyǵy Bolat Majaǵulov, «Qazaq arýy-2014» baıqaýynyń prodúseri Baıan Esentaevalar boldy. Qazylar alqasyna QR Premer-Mınıstriniń orynbasary Gúlshara Ábdiqalyqova jetekshilik etti.
Jarty saǵat boıy keńeskennen keıin qazylar alqasy ózderiniń sheimimin jarıa etti. Úshinshi oryn elordalyq Gúlmaral Qajıhanǵa berildi. Ekinshi oryndy mańǵystaýlyq Ulpan Nurmanova jeńip aldy. Birinshi orynǵa Shyǵys Qazaqstan oblysynyń ókili Aıaýlym Erǵazy ıe boldy.
Baıqaýdyń Gran-prıi jáne «Qazaq arýy-2014» ataǵy Mańǵystaý oblysynan kelgen Gúlnaz Jolanovaǵa buıyrdy. Ol arý tájin ótken jylǵy jeńimpaz Áıgerim Qanatbaevanyń qolynan aldy.
«Jyl ótken saıyn «Qazaq arýy» baıqaýynyń mańyzy men maǵynasy arta túsýde. Búgin bári de óte jaqsy ótti. Meni qazylar alqasyna shaqyrǵan bolatyn. Men oǵan zor qanaǵattanǵandyq sezimmen keldim. Bul jaı ǵana ásemdik konkýrsy emes, onyń negizine qazaq qyzynyń sulýlyǵy men ishki mazmuny, qazaq halqynyń dástúrleri men tilin bilýi, zıalylyq, jaqsy ádep pen úlgi sıaqty qundylyqtar alyndy. Bul bizdiń jastarymyz úshin óte paıdaly ǵoı dep oılaımyn», - dep atap ótti QR Premer-Mınıstriniń orynbasary Gúlshara Ábdiqalyqova.
«Bıylǵy jyly baıqaý tórtinshi ret jáne Astanada alǵash ret ótip otyr. Budan buryn Almatyda ótkizilip kelgen edi. Bizdi qala ákimdigi qoldady. Konkýrs tujyrymdamasy ózgergen joq, ol túsinikti de - biz jastardy tárbıeleımiz, bul da ıdeologıa. Sonymen qatar biz qazirgi qazaq qyzy qandaı bolýy kerek degen máselege jaýap izdedik. Ol ádemi, bilimdi, óz halqynyń tilin, tarıhyn, mádenıetin biletin bolýy tıis. Meni qazirgi jastardyń tereń bilimi tańǵaldyrdy. Jas quraqtaı ósip kele jatqan kishkentaı qyzdar bizdiń baıqaýymyzdyń murattarynda tárbıelenetin bolady», - dedi «Qazaq arýy-2014» baıqaýynyń prodúseri Baıan Esentaeva. Ol bul baıqaý budan bylaı Astanada ótkiziletinine senimin bildirdi.
QazAqparat
