Ýkraına Reseı tarapynan joıqyn aqparattyq shabýylǵa ushyrady. Ýkraına da biz sekildi 23 jylda aqparattyq qaýipsizdigin nyǵaıtpaǵany, etek-jeńin jınamaǵany belgili boldy. Sonyń kesirinen Reseı tarapynan jasalǵan shabýyldyń betin qaıtara almaı otyr. Ózbekstan áldeqashan Reseıdiń kóptegen telearnalaryn efırlik jıilikten alyp tastady. Kórgisi kelgender spýtnıktik antena arqyly ǵana tamashalaı alady. Al bizde she? Reseı bizdiń aqparattyq keńistigimizde emin-erkin, tolyq qojaıyn sezinedi. Qajet kezinde tóbemizge "áńgirtaıaq" oınatyp alýǵa ábden daıyn. Tipti, sheneýnikterimiz tól basylymdarymyzdy mensinbeı, reseılik basylymdardy artyq kóredi. Solarǵa suhbat berip, solardyń yǵyna jyǵylady. Ýkraınadaǵy jaǵdaıdy bizdiń salyq tóleýshilerdiń qaltasynan qarjylandyryp otyrǵan "Mır", "ORT-Eýrazıa", "Qazaqstan" ulttyq arnasy tolyǵymen reseılik kózqaraspen berip otyr. "AIF v Kazahstane", "Komsomolskaıa pravda v Kazahstane", "Moskovskıı komsomoloes v Kazahstane", "Izvestıa v Kazahstane" sıaqty basylymdar dál osy sátte - aqparat taratýshy emes, arandatýshy qyzmetti tolyq atqaryp otyr. Oǵan "Rýsskıe v Kazahstane", "Zakon kz", "Nýr kz", "Interfaks v Kazahstane" j.t.b saıttar men elektrondyq aqparat agenttikterin qosyńyz. Qudaı betin aýlaq etsin, eger, erteń Reseı Qazaqstan shekarasyna kóz alartatyn bolsa, bul basylymdar kimdi qoldaıdy? Ádildik týraly aýyz asha ala ma? Álde, ultaralyq qaqtyǵysty órshitip, ózge eldiń soıylyn soǵa ma?

     Prezıdent ákimshiligi men Aqparat agenttigi jedel túrde - basshylary men qosshylary, keńesshileri kil Reseıden kelgen "Qazaqstan" ulttyq arnasy, "ORT-Eýrazıa" birinshi arnasy, "Zakon kz" portaly jumysyna tolyq monıtorıń jasap, kadr saıasatyn taǵy bir pysyqtap shyǵýy tıis. Óıtkeni, búgingi kúnniń tártibine aqparattyq jáne memlekettik qaýipsizdikti ótkir bolyp otyr.  Al, bizdiń aqparattyq belbeýimiz bos tartylǵan.

Toqtar Jaqash

"Qamshy"  silteıdi