"Álibı isi" boıynsha elge aty shyqqan kásipker Qaırat Jamalıev 13 jyldyq merzimin Almaty oblysy Zarechnyı eldi mekeninde ornalasqan qatań rejımdegi túzeý mekemesinde ótep jatqany belgili. Búginge deıin ol óziniń zańdy áıeli Alóna Jamalıevamen jáne óz ápkesimen eki ret kezdesken, - dep habarlaıdy Astana arnasy. 

Túrmege alǵash kelgen kezde Jamalıevti karantındi bólimge ornalastyrǵan. Artynsha ózge sottalýshylardyń janynan jataqhanadan oryn beripti. Búginde ol 100-den astam adammen birge jazasyn ótep jatyr. Eks-kásipker depressıaǵa túspeı, sporttyq sharalarǵa qatysyp turady eken. Sondaı-aq, bos ýaqytynda shahmat oınap, kitap oqıdy deıdi LA-155/8 mekemesiniń basshysy Nurlan Qalıaqbarov tilshilerge bergen suhbatynda.

"Mekemeniń qoǵamdyq ómirine belsendi aralasady, eshqandaı ereje buzǵan emes. Jalpy, munda eshkimge eshqandaı artyqshylyqtar kórsetilmegen, ózge sottalýshylar sekildi jazasyn ótep jatyr. Alǵashqy kelgen 15 kúnde ol karantındi bólimde boldy" deıdi mekeme basshysy.

Jamalıevtiń ózi bolsa jýrnalısermen kezdesýden úzildi-kesildi bas tartyp keledi. Al, túrme basshylary onyń tártibiniń jaqsy bolýyna baılanysty jeńildetilgen rejımdegi túrmege aýysýy múmkin ekenin aıtyp otyr. Eger aýysa qalsa Jamalıev týystarymen jıi kórisetin bolady.

"Tek 9 aı ótkennen keıin ǵana qarastyramyz. Eger onyń tártibi jaqsy bolsa jeńildetilgen rejımge aýysady. Aıyrmashylyǵy - týystarymen kezdesýlerdiń kóptiginde ǵana, ózge erekshelikteri joq. Ol jaqta jylyna 4 uzaq jáne 4 qysqa kezdesýler uıymdastyrylady" dedi Qalıaqbarov.

Esterińizge salaıyq, Qaırat Jamalıev byltyr Astana turǵyny Álibı Jumaǵulovtan toqalyn qyzǵanyp, ony ólimshi etip sabaǵan edi. Kásipkerge ol kezde dosy Arman Ábiltaev pen júrgizýshisi Anatolıı Prıbytkov kómektesken. Sot úkimine sáıkes, Ábiltaev 12 jylǵa, Prıbytkov bolsa 8 jylǵa bas bostandyǵynan aıryldy.