Qazaqstan Prezıdenti Nursultan Nazarbaev ushaqty aldyńǵy shasısiz qondyrǵan pılot Dmıtrıı Rodın men jarylys kezinde sarbazdy denesimen jaýyp qorǵaǵan Qaırat Úmbetovti memlekettik nagradalarmen marapattaý týraly jarlyqqa qol qoıdy, - dep habarlaıdy Qamshy.kz.

Bul týraly Aqordanyń baspsóz qyzmeti habar taratty.

"Qazaqstan Respýblıkasyna sińirgen asa úzdik eńbegi, áskerı jáne qyzmettik boryshyn atqarý ústinde kórsetken erligi men janqıarlyǵy úshin: joǵary dárejeli erekshelik belgisi - "Halyq qaharmany" ataǵy berilip, aıryqsha erekshelik belgisi - Altyn juldyz ben "Otan" ordeni tapsyrylsyn: Rodın Dmıtrıı Olegovıch - "Fokker-100" áýe kemesiniń komandıri, Almaty qalasy; Úmbetov Qaırat Jarylqasynuly - Ulttyq ulan "Ortalyq" óńirlik qolbasshylyǵynyń shtab bastyǵy - 6505 áskerı bólimi komandıriniń birinshi orynbasary", - delingen jarlyqta.