Búgin "Rossıa 24" arnasynan Qyrymnyń Reseıge qosylǵany týraly Kremlde jalpaq álemge jar salǵan úlken jınalys boldy. Jınalys bastan - aqyr tikeleı efrden taratyldy. Sóz sóılegen Reseı Prezıdenti Pýtın de, jınalǵan qaýym da janarlarynan qýanysh jasyn tóge otyryp, bir baqytty sátti bastan keshirdi. Reseı óziniń álem aldyndaǵy taǵy bir úlken jeńisin atap ótti. Barsha orys halqynyń eńsesi kóterildi. AQSH pen Eýropa Odaǵy qansha jerden sanksıa salsyn, jazalasyn, moıyndamasyn, oǵan qarap jatqan Pýtın joq, Qyrym respýblıkasyn Reseı quramyna qosý týraly kelisim jobasyn maquldady, eki jaqtyly kelisimge qol qoıysty. Sonymen bul máselege núkte qoıyldy degen sóz. Pýtınniń sózine qaraǵanda, Reseı men Ýkraına arasynda belgilengen jańa shegara syzyǵy joq eken. Baıaǵy Keńestik kezeńniń súrleýi ǵana bar kórinedi. Osy jerde bizdiń Elbasymyz N.Nazarbaevtyń Aınaladaǵy kórshilermen tutasyp jatqan shegarany jańa talapqa saı der kezinde bekitip alǵan erligin; shegeralyq oblystardy bir - birine qosyp, qazaqtardyń ara salmaǵyn arttyrǵan sheshimin; El astanasyn Aqmolaǵa aýystyrǵan tarıhı erligin erekshe atap ótken jón. Bul alǵashqy qaterden aman alyp qalýy – qaldy. Biraq, máńgilik másele áli sheshilgen joq! Ol – shettegi qazaqtardyń osynda oralýy! Jalpy, Qyrymnyń Ýkraına quramynda bolýy nemese Reseıge ótýi – bir qyrynan alǵanda onsha mańyzdy emes. Ol báribir bodandyq qamytynan qutylǵan joq. Bul jerde Reseıdiń áli de burynǵy qýatynda ekenin, Pýtınniń ımperatorlyqtyń rýhyn úzbeı jalǵastyra alǵanyn moıyndaý kerek. Biz kóbinde AQSH - qa úmit artamyz. AQSH Reseı men Qytaıdy qysa tússe eken deımiz. Sóıtip, «Buqa súrse, azban súısinediniń» kúıin keshemiz. Endigi jerde ondaı esek dámeni doǵarǵanymyz jón! Qazaqstanǵa shegara syrtynda qalǵan qazaq jerin qaıtaryp alýdy talap etip otyrǵan eshkim joq.Tek, óz aıaǵymen kelgeli otyrǵan shettegi qazaqtardyń jolyn ashý, jeńildetilgen tártippen tezdetip azamattyq berý, qaterli aımaq – Sotústikti halyqqa toltyrý kerek! Men N.Nazarbaevtan osyndaı sheshim kútem! «Shettegi qazaq kelsin!» degen Qaýlynyń qabyldanýyn; Elbasynyń erligine búgingi orys halqy qusap búkil Alash júrtynyń aıyzy qanyp qýanǵan, kózine jas alǵan sátin kórgim keledi! Mende basqa arman joq ázirge, aǵaıyn!