Londonda bıik óksheli týflı kıýden bas tartqan resepshn qyzmetkeri jalaqy berilmeı keńseden qýyldy, - dep habarlaıdy Bı-Bı-Sı agenttigi.

27 jastaǵy Nıkol Torptyń aıtýyna qaraǵanda,  ol  PriceWaterhouseCoopers aýdıtorlyq kompanıasynyń keńsesine ýaqytsha jumys isteý úshin kelgen.

Onda «áıel qyzmetker 5-ten 20 sm bıik óksheli aıaq kıim kıý» kerek degen talap qoıǵan. Tipti oǵan dúkenge baryp sondaı týflı satyp ákelýdi mindettegen. Alaıda Torp kúni boıy bıik óksheli aıaq kıimmen júrýdiń qıynǵa soǵatynyn aıtyp bas tartqan. Ol kompanıa er adamdarǵa da osyndaı talap qoıa ma dep suraǵan.

Torptyń sózine kúlgen kompanıa ókilderi onyń keńseden ketýin talap etken ári aqsha tólemegen.

PWC kompanıasy qyzmetkerleriniń syrtqy kelbetine jáne kıimine qoıylar talaptardy Portico kompanıasy anyqtaıdy. Olar osy talapta aıaq kıimniń qandaı bolýy kerektigi qamtylǵanyn aıtyp otyr.

Torp keńseden qýylǵan soń, basynan ótken jaǵdaıdy Feısbýkte jazdy. Onyń jazbasyna osyndaı jaǵdaıǵa dýshar bolǵan qyz-kelinshekter qoldaý bildirdi.

Brıtan zańy boıynsha ár kompanıa óz qyzmetkeriniń dress-kodyn anyqtaýǵa quqyǵy bar. Qazir Torp osy zańdy ózgertýge qol jınap jatyr.