Jer komısıasynyń otyrysynda ekonomıs, Bolathan Taıjan qorynyń prezıdenti Muhtar Taıjan sóz alyp, komısıa aldyndaǵy negizgi mindetter qandaı bolý kerektigin atap ótti, - dep habarlaıdy Qamshy.kz.

«Qazaqty jalqaý, erinshek deıtindermen kelispeımin. Ol – quldyq sananyń kórinisi. Osy qazir ózimiz otyrǵan Astanadaǵy kóptegen ǵımarattar táýelsizdik jyldary qazaqtyń qolymen salyndy. Qazaqty jalqaý deý durys emes. Ózim aýylsharýashylyq salasynda qyzmet etip júrmin. Sharýalarymyzdyń da múmkindikterimen tanyspyn»,-degen saıasatker komısıa aldynda qyrýar mindet turǵanyn aıtty.

«Prezıdent «Halyqqa unamaıtyn zań kerek emes» dedi. Biz de sony aıtamyz. Halyq sońǵy birneshe aptada óz ustanymdaryn bildirdi. Ol ustanym boıynsha halyq jerdi sheteldikterge satýǵa da, jalǵa berýge de qarsy ekenin kórip otyrmyz. Osy stoldyń basynda otyrǵandardyń kóbi el jaqsylary, akademıkter, depýtattar, úkimet ókilderi. Biraq, eshkim halyqtan joǵarymyn dep aıta almaıdy. Halyq amalsyzdyqtan, sheneýnikter tyńdamaǵan soń mıtıńke shyqty. Qazir osyndaı múmkindik berilgen soń, jer máselesin aqylmen, sabyrmen sheshetin ýaqyt keldi. Bárin talqylap, bir sheshimge keleıik.

Máselen, úlesinde 49 paıyz sheteldik aksıasy bar kompanıalar jerdi jalǵa ala ala ma? Osyny naqtylaý kerekpiz. Óıtkeni, buǵan halyq qarsy. 10,25 jylǵa jalǵa berýge de qarsy. Biz bul zańdy ózgertý kerekpiz. Men óz basym ol zańǵa qatysty jumys tobyna kirýge, sol úshin Astanada úı jaldap turýǵa da ázirmin, - dedi Muhtar Taıjan.

Sondaı-aq, saıasatker jerge qatysty narazylyq aksıalaryna qatysqan azamattardyń taǵdyryna da alańdaýshylyq bildirdi.

«Halyq mıtıńke shyqpaǵanda, biz mynadaı jıynda otyrmas edik. Sondyqtan, komısıa ol mıtıńke shyqqan adamdardyń qýdalanbaýyn qamtamasyz etsin. Negizsiz «ROVD-ǵa» shaqyrýdy toqtatý kerek», - dedi M. Taıjan.