Elimizdiń ishki ister mınıstrligi ókilderi zańǵa qaıshy málimet taratý derekterin anyqtaý úshin Internet-keńistikti baqylaýǵa alǵanyn málimdedi, - dep habarlaıdy Qamshy.kz Tengrinews.kz – ke silteme jasap.
Bul týraly mınıstrliktiń Memlekettik til jáne aqparat departamentiniń dırektory Almas Sádýbaev málimdegen.
«21 mamyrda mıtıń ótkizý týraly ótinishterge baılanysty óńirlerde qaýipsizdik sharalary kúsheıtildi me?» degen suraqqa vedomstvo ókilderi quqyq qorǵaý organdarynyń óńirlerdegi turaqtylyqty saqtaýǵa, sonymen qatar elde qajetti tártip pen qaýipsizdikti saqtaýǵa árdaıym sharalar júrgizetinin aıtyp, jaýap qatty.
«Óz quzyrynyń aıasynda zańǵa qaıshy málimetterdiń áleýmettik jelilerde jáne messendjerlerde taratýǵa, onyń ishinde áleýmettik, ulttyq jáne basqa da arazdyq týǵyzýǵa qarsy sharalar kesheni júzege asyrylý ústinde. Internet-keńistiginde zańǵa qaıshy málimetti anyqtaý maqsatynda jıi baqylaý júrgizilip otyrady, árbir derek boıynsha shara júrgiziledi. Zańsyz aksıalarǵa qatysýǵa shaqyrý týraly málimetti taratqandar da zańǵa sáıkes jaýapqa tartylady nemese olarmen túsindirý jumystary júrgiziledi”, - dep habarlady Sádýbaev.
«İshki ister mınıstrligi qazirgi zańnyń normalarynda ruqsat etilmegen aksıalardy uıymdastyrýshylardy, sonymen qatar, áleýmettik, ulttyq jáne basqa da arazdyqty qozdyratyn málimetti taratqandardy ákimshilik jáne qylmystyq jaýapkershilikke tartýdy qarastyratynyn eskertedi», - dedi ol.
Sádýbaevtyń aıtýynsha, «búginde elimizde zańsyz ádis bolmasa beıbit jıyndar ótkizýge jáne óz qalaýy men pikirin bildirýge jaǵdaı jasalǵan. Máselen, QR Konstıtýsıasynyń 32-babyna sáıkes azamattar beıbit ári qarýsyz jınalyp, jıyn, mıtıń, sherý, tosqaýyldarǵa turýǵa haqyly».
«Bul quqyqty paıdalaný memlekettik qaýipsizdik, qoǵamdyq tártip, densaýlyq saqtaý, basqa adamdardyń quqyqtary men bostandyqtaryn qorǵaý múddeleri úshin zańmen shektelýi múmkin. Osy zańnyń normasy boıynsha beıbit aksıalardy ótkizýdiń jalǵyz sharty - aldyn ala jergilikti atqarýshy bıliginiń ruqsatyn alý. Bul ruqsattyń ózi qoǵamdyq oryndarda jıyn men mıtıń ótkizýge ǵana talap etiledi, al jabyq oryndarda eshqandaı da shekteýler men talaptar joq. Zańnama arqyly bekitilgen tártip qoǵamdyq tártipti, azamattardy qandaı da bir qastandyqtan saqtaýdy qamtamasyz etý úshin qajet, sonymen qatar baqylanbaǵan aksıalardyń nátıjesinde paıda bolýy múmkin jappaı zańbuzýshylyqtardyń aldyn alý úshin qajet», - dedi ol.
Aıta keteıik, áleýmettik jelilerde ár óńirde belsendilerdiń ustalyp jatqany jaıly málimetter taraý ústinde.
Osyǵan deıin Almaty prokýrory qala ákiminiń jer máselesi boıynsha 21 mamyrda aksıalardy ótkizý týraly berilgen ótinishterdi qarastyryp, oǵan tyıym salǵanyn habarlap, ruqsat etilmegen sherýge shyǵýdyń zańǵa qaıshy ekenin eskertken bolatyn.
Keıin İshki ister mınıstri beıbit mıtıńke qatysty qaýipsizdik sharalarynyń kúsheıtilýi týraly suraqqa jaýap bergen edi. "Biz barlyq sharany qadaǵalap otyrmyz. Meniń oıymsha, mıtıń ótkizýge negiz bolatyn barlyq suraqtar sheshildi. Memlekettik komısıa jumys istep jatyr. Mıtıń ótkizýdiń qajettiligi joq", - degen bolatyn Qasymov.
