Elimizde qolǵa alynǵan jer reformasyna narazylyq tanytqan birneshe belsendi kesheden bastap qamaýǵa alynýda. Olarǵa QR-nyń «Ákimshilik quqyqbuzýshylyqtar týraly» Kodeksiniń beıbit sherýler uıymdastyrý men ótkizýge qatysty baptaryn buzdy degen aıyp taǵylýda, - dep habarlaıdy Qamshy.kz Azattyqqa silteme jasap.
Keshe Astana, Almaty qalalarynda jáne óńirlerde segiz adam tutqyndalsa, búgin olardyń sany onnan asqany belgili bolyp otyr. Polısıa tutqyndaǵan azamattardyń deni 10-15 táýlikke ákimshilik qamaýǵa alyndy.
Astana qalasynda azamattyq belsendi, zańger, «Alash joly» qozǵalysy jetekshileriniń biri Maqsat İlıasuly keshe keshke sot sheshimimen 10 táýlikke qamaldy. Oǵan «Ruqsat etilmegen narazylyq aksıasyna shaqyrdy» degen aıyp taǵylǵan.
Maqsat İlıasuly - jer reformasy komısıasy múshesi. Komısıanyń alǵashqy otyrysyna qatysqan ol kelesi jıyndaryna barýdan bas tartqan.
Atyraýda azamattyq belsendi Maks Boqaev 15 táýlikke qamaldy. Ony keshe Oral prokýratýrasy shaqyryp, jaýap alǵan edi. Boqaev abaqtyǵa ruqsat etilmegen narazylyq aksıasyna shaqyrǵany úshin jabylǵan.
Atyraý ákimshilik soty Talǵat Aıan esimdi azamattyq belsendini de 15 táýlikke qamaýǵa sheshim shyǵarǵan.
Belsendilerdi qamaý sheshimi ákimshilik quqyq kodeksiniń 488-baby ("Beıbit jınalystardy, mıtıńilerdi, sherýlerdi, pıketter men demonstrasıalardy uıymdastyrý jáne ótkizý tártibi týraly zańnamasyn buzý") 3-tarmaǵyna negizdelgen.
Maks Boqaev pen Talǵat Aıan – Atyraýda sáýirdiń 24-i ótken jerdi satý men sheteldikterge jalǵa berýge qarsy mıtıń uıymdastyrǵan belsendiler.
Mamyrdyń 17-si kúni keshki saǵat alty-jetiler shamasynda almatylyq quqyq qorǵaýshy Baqytjan Tóreǵojına ózin jáne taǵy birneshe azamatty polıseıler ustap, Almaly aýdanaralyq ákimshilik sotyna apara jatqanyn habarlady.
Baqytjan Tóreǵojına «Meni 488-bap, ıaǵnı «ruqsat etilmegen mıtıń uıymdastyrý» baby boıynsha aıyptap otyr. Menimen birge polısıa kóliginde otyrǵan Geroıhan Qystaýbaev «buzaqylyq» baby boıynsha aıyptalǵan, al, Altynaı Ádilova, Súıindik Aldabergenov pen Qural Ismanovqa 488-bap boıynsha aıyp taǵyp jatyr» degen.
Keıinnen belsendiler Facebook paraqshasynda Súıindik Aldabergenov pen Baqytjan Tóreǵojınanyń ákimshilik quqyq kodeksiniń 488-baby boıynsha 15 táýlikke qamalǵanyn jazdy. Cotqa qatysqan advokat Janar Balǵabaeva olarmen birge Marat Ýathan esimdi azamat pen Jalpyulttyq sosıal-demokratıalyq partıasynyń (JSDP) múshesi Qýat Kúnbolatov degen adamnyń da «ruqsat etilmegen mıtıń uıymdastyrý» aıyby boıynsha 15 táýlikke qamalǵanyn habarlady.
Túrli aqparattarǵa qaraǵanda, Almatyda belsendiler Ermek Narymbaev jáne Sahıb Jańabaev ta ustalǵan. Keıin olardyń bosatylǵany habarlandy.
Al tústen keıin aýdanaralyq ákimshilik sot Móldir Adylovany ákimshilik quqyq kodeksiniń 488-baby (ruqsatsyz mıtıń uıymdastyrý) boıynsha aıyptap, 15 táýlikke abaqtyǵa japty.
Ermek Narymbaevtyń aıtýynsha, Geroıhan Qystaýbaevqa qatysty sot ta búgin ótýi kerek.
Keshe Almaty oblysy Talǵar aýdandyq ishki ister basqarmasy (İİB) qyzmetkerleriniń 22 jastaǵy Manas Ábdimanap esimdi azamatty ustap áketken bolatyn.
Búgin atalǵan aýdannyń Birlik aýyly turǵyndary Manas Ábdimanap pen Qýanysh Sultanálı ekeýiniń 15 táýlikke qamalǵany anyqtaldy. Ony osy aýdannyń İİB ýchaskelik ınspektorlar bastyǵy Nurjan Kúntýnov rastady. «Ákimshilik kodekstiń 488-baby boıynsha (ruqsat etilmegen mıtıń uıymdastyrý) olar 15 táýlikke qamaldy», - deıdi Kúntýnov.
Jezqazǵandaǵy azamattyq belsendi Berik Jaǵyparov ta Facebook paraqshasy arqyly óziniń qala prokýratýrasyna shaqyrylǵanyn habarlady. Jaǵyparov prokýratýraǵa óziniń jer máselesi boıynsha shaqyrylýy múmkin ekenin jazdy.
Al, Batys Qazaqstan oblysy Oral qalasyndaǵy azamattyq belsendi Janat Esentaevtiń ústinen qylmystyq kodekstiń 174-baby (arazdyq qozdyrý) boıynsha aıyptalyp, sotqa deıingi tergeý sharasy aıasynda úsh kúnge tutqyndalǵan.
Sondaı-aq, aqparat quraldary Azattyq saıtynyń OQO-daǵy tilshisi Dılara Isa men Shymkenttegi «Temirqazyq-oı» gazetiniń bas redaktory Anar Súleeva da Azattyqqa prokýratýraǵa shaqyrtylǵanyn habarlady.
