«Islam memleketi» lańkestik uıymynyń sodyrlary Iraktyń Mosýl qalasynda tyńshylyqpen aınalysty dep aıyptalǵan 25 adamdy azot qyshqyly toltyrylǵan ydysqa salyp, azaptap óltirdi, - dep habarlaıdy Qamshy.kz SN-ge silteme jasap.

Qaza tapqandardyń bári er azamattar. Olar Irak úkimetine jumys istedi dep aıyptalǵan. Basylymnyń habarlaýynsha, lańkester 25 adamnyń barlyǵyn bir jipke baılap, qyshqyl toly ydysqa birinen soń birin salǵan.

Aıta keteıik, 12 mamyr kúni Túrkıada júrgizilgen reıd barysynda Elázıg provınsıasynan «Islam memleketi» uıymy jetekshileriniń biri ustalǵan bolatyn. Onymen birge quqyq qorǵaýshylar sodyrlardyń baskeserin de qolǵa túsirdi. Ol Sırıa aýmaǵynda jarıa túrde adamdardy óltirýmen aınalysyp kelgen. Ustalǵandardan uıymnyń qupıa qujattary tárkilendi.

Al, 11 mamyrda «Islam memleketi» basshylary Irakta uıymnan qashyp shyqpaq bolǵan 35 adamdy tirideı kómip tastady. 10 mamyrda sodyrlar 5 adamnan turatyn bir otbasyn túgeldeı órtep jibergen.

Adamdar quqyǵyn qorǵaýmen aınalysatyn uıymdardyń málimetinshe, «Islam memleketi» lańkestik uıymy búginge deıin 4144 adamdy ólim jazasyna kesip, úkimdi júzege asyrǵan. Olardyń 2230-y qarapaıym turǵyndar, arasynda áıelder men balalar da bar. Al, 1100 adam — tutqynǵa túsken áskerıler. Sondaı-aq, ishki kıkiljiń barysynda uıymǵa múshe 400 sodyrdyń da kózi joıylypty.