Keshe Astanada ótken Eýrazıalyq odaqqa múshe memleket basshylarynyń bas qosýynda RF prezıdenti osyndaı usynys tastaly, - dep habarlaıdy Qamshy.kz KTK arnasyna silteme jasap.
-Astana búgin Eýrazıanyń naǵyz saıası ortalyǵyna aınaldy. 5 memlekettiń prezıdentteri 2 jyl buryn dál osy mamyr aıynda Elordada qurylǵan Eýrazıalyq odaqtyń paıdasy men tyǵyryqqa tirelgen tustaryn ashyq aıtty. Basqosý qojaıyny retinde Nazarbaev birqatar áriptesterimen jeke kezdesip te úlgerdi.
Solardyń biri - Reseı prezıdenti. Vladımır Pýtındi Nursultan Nazarbaev Aqordanyń aldyna shyǵyp kútip aldy. Halyqaralyq protokolǵa salsaq, bul úlken qurmet. Nazarbaev pen Pýtın jeke-dara kelissóz júrgizip jatqanda, rezıdensıaǵa Lýkashenko, Sargsán, Atambaev kirip otyrys zalyna bettep bara jatty. Keıin Eýrazıalyq bestik jabyq esik jaǵdaıynda ózara keńesip, budan soń Qazaqstan, Reseı, Belarýs, Qyrǵyzstan men Armenıa basshylary keńeıtilgen quramda ıntegrasıalyq uıymnyń 2 jyldaǵy tabysy men tóngen qaterler týraly aıtty.
Nursultan Nazarbaev, Qazaqstan Respýblıkasynyń prezıdenti:
-Álemdik ekonomıkadaǵy turaqsyzdyq bárimiz úshin synaq bolyp tur. Sondyqtan birlesip, qoıan-qoltyq jumys isteýimiz qajet. Tyǵyryqtan shyǵar joldy izdeýimiz kerek.
Iá, daǵdarys shatqaıaqtatyp jibergen sala kóp. Eýroodaqtyń Máskeýge salǵan sanksıasy, munaıdan túsken paıdaǵa táýeldi Reseı men Qazaqstan ósiminiń baıaýlaýy Mınsk, Erevan men Bishkektegi ekonomıkalyq ahýaldy qıyndatyp jiberdi. Ásirese, kóp úmit kútilgen ıntegrasıalyq uıymnyń aqsap jatqan tustaryn Lýkashenko kóbirek aıtty.
Aleksandr Lýkashenko, Belarýs Respýblıkasynyń prezıdenti:
-Ókinishke qaraı, biz josparlaǵandaı alǵa jyljý baıqalmaıdy. Sońǵy úsh jylda ózara taýar aınalymy quldyrap ketti. Energetıka, munaı-gazǵa qatysty biraz joba jarty jolda qaldy. Sheshim qabyldaýda birizdilik joq.
Biraq, basqalar qyzýqandy Lýkashenko aıtqandaı jaǵdaıdyń asa qorqynyshty emestigine senimdi. Bastysy odaqtastar taýar aınalymyna kedergi keltirmeýi tıis. Iaǵnı, kelisilgen saıasat júrgizip 2025 jylǵa qaraı ortaq munaı men gaz naryǵyn qurýǵa kelisti. Bul 5 memleket bir-birinen munaıdy baj salyǵynsyz, naryqtaǵy baǵamen satyp alady degen sóz. Osy jerde Pýtın ekonomıkadan bólek,aqparat salasyn birigip retteýdi usyndy.
Vladımır Pýtın, Reseı Federasıasynyń prezıdenti:
-Odaq aıasynda birtutas aqparattyq keńistik qurýdyń bolashaǵy zor. Bul úshin Eýrazıalyq komısıa arnaıy tujyrymdama daıyndap, tıimdi joba usynýy tıis. Sonymen qatar 2019 jylǵa qaraı ortaq elektr energetıkalyq naryqty qalyptastyrýymyz qajet.
Ortaq naryqtyń ne bereri ázirshe belgisiz. Armenıa prezıdenti saýdadan kóri, taýly Qarabaqty kóbirek qozǵasa, únsiz qalmaǵan Atambaev qyrǵyz taýarynyń tasymalyna kederginiń kóptigin aıtyp shaǵyndy.
Osylaısha, prezıdentter Aqordada 4 saǵat boıy ashyq sóılesti. Álemdegi ýshyqqan geosaıası qyrǵı-qabaqqa qaramastan Eýrazıalyq odaq eshkimnen bólektengisi kelmeıdi. Tipti Eýropalyq odaqpen baılanys ornatyp, dúnıejúzine tıimdi ıntegrasıalyq uıym ekenin dáleldeýge ázir.
