Aýrýhananyń jedel járdem kólikterin qaqpadan ótkizbeı qoıyp, dárigerlerdi jalyndyrǵan júrgizýshi de jaı adam emes bolýy múmkin. Shuǵyl shaqyrtýdan shyǵyp kele jatqan medısına qyzmetkerleriniń "jol berińiz" degenine qulaq aspaı, kerisinshe balaǵattap, qymbat kóligin jyljytýǵa eringen azamattyń kim ekenin ishki ister departamenti anyqtap beremiz dedi.
Ońtústik Qazaqstan oblysynda tirkelgen 631 XZA memlekettik nómerli kólik júrgizýshisi shuǵyl shaqyrtýdan shyǵyp kele jatqan jedel járdem kóligi arnaıy dybys belgisin qossa da, dárigerler jol berýin ótinse de bylq etpeıdi. Júrgizýshi kirýge ruqsaty bar ekenin aıtyp, dárigerlerge ashýlanyp, yzadan jarylardaı bolyp otyr.
Oqıǵa №1 Balalar aýrýhanasynyń qaqpasynyń aldynda bolǵan. "Infınıtı" avtokóliginiń júrgizýshisi jedel járdem kóligine jol bermeı, onyń júrgizýshisin beıpil sózben balaǵattap tastaıdy. Aýrýhana basshylyǵy ol azamattyń qazirge deıin keshirim surap, kelmegenin aıtady.
Al qala turǵyndary jedel járdemge jol bermeý - adam ómirimen oınaýmen birdeı deıdi. Olardyń pikiri, mundaı dórekilik úshin qandaı jaǵdaı bolmasyn aıamaı jazaǵa tartý kerek.
Júrgizýshiniń qolyndaǵy qaǵaz emhana aýmaǵyna kólikpen kirýge emes, balasynyń qasyna barýǵa beriletin ruqsatnama eken. Al kún saıyn shamamen 40-50 bala aýrýhanaǵa túsedi. Nege ekeni, kire beriste mundaı áreketter jıi bolyp turady deıdi mekemeniń bas dárigeri.
ABAI QUSAIYNOV, Balalar shuǵyl medısınalyq járdem ortalyǵynyń bas dárigeri:
- Ár azamattyń óziniń mádenıetine baılanysty, tárbıesine baılanysty bolyp otyrǵan nárse ǵoı. Bizdiń dıspecher bóliminiń qyzmetkerine siz menen keshirim surańyz degen sózder aıtylypty.
Jol talǵamaıtyn "Infınıtı" qojaıynynyń kim ekeni, qandaı mekemede qyzmet atqaratyny ázirge anyqtalǵan joq. Quqyqbuzýshylyq deregine baılanysty qalalyq İİD-i qazir tekseris jumystaryn júrgizip jatyr. Turǵyndar budan ózge shuǵyl medısınalyq kómek kóligine qaladaǵy júrgizýshiler kóp jaǵdaıda ońaılyqpen jol bermeıtini jasyryn emes deıdi.
