Advokat Ermegıaevtiń para alǵany dáleldenbegenin málimdedi, - dep habarlaıdy Qamshy.kz Tengrinews.kz-ke silteme jasap. "Astana EKSPO - 2017" isi boıynsha taraptardy qatar tyńdaý bastaldy. 

"İste bastysy joq: Ermegıaevtiń zańsyz buıryqtary men qaýlylary nemese osy taqyryptaǵy áńgimeleri joq. Bireý-mireýden qarajat alǵany jaıly derek joq. (...) Sybaılastary arqyly Ermegıaevke aqsha jetkizildi delingen derek te joq. Onyń ústine tergeý anyqtamady delingen naqty sybaılas ta joq. Osyndaı jaǵdaıda Ermegıaevtiń isinde QR QK 311-babynyń 1-bóligi boıynsha (Para alý") kinásiniń bar ekenin dáleldeıtin qylmys quramy jaıly aıtý - zańsyz", - dedi sotqa Ermegıaevtiń advokaty Galına Álimǵojına. 

"311 baptyń pozısıasynan anyqtalǵan, jaýap alynǵan jáne ózge dáleldermen naqty kórsetpe berip otyrǵan sybaılas qarastyrylyp otyr. Munda másele qylmystyń jasalǵanynyń dáleldengeni týraly ǵana bolady. Osy jaǵdaıda tergeýge táýeldi tulǵalardyń jalǵan kórsetpelerinen basqa, osy iste dálelder joq. Al aqsha jetkizdi delingen adamnan jaýap alynǵany bylaı tursyn, ol anyqtalmady da", - dedi ulttyq kompanıanyń eks-basshysynyń advokaty.

Osyǵan deıin prokýrorlar Talǵat Ermegıaevti 14 jylǵa bas bostandyǵynan aıyrýdy suraǵan bolatyn. İstiń qalǵan fıgýranttaryna 3 jyldan 11 jylǵa deıin bas bostandyǵynan aıyrý jazasy suraldy.