«Habarda» júrgende toı júrgizetin bir asaba baýyrym habarlasty. Qazaqtyń toıynan nanyn taýyp júrgen ortanqol asabalardyń biri. Azdap «áý» deıtini de bar. Bul joly sozbalaqtamaı birden tótesinen ketti. 
– Aǵa, maǵan sizderde baǵdarlama júrgizý kerek! Jalaqy, qalamaqy degenderińizdiń qajeti de joq. «Kók jáshikten» kórinip júrsem boldy...
– Oý, baýyrym, ne boldy? Saǵan bere qoıatyndaı baǵdarlama joq bizde. Ekonomıka, saıasat degenderge tisiń batpaıtynyn óziń de sezip turǵan bolarsyń?
– Aǵa, maǵan báribir. El kórse boldy. Bul degenińiz – pıar ǵoı! Al, "qara" pıardyń da – pıar ekenin biletin shyǵarsyz? Televızorǵa shyqsam, Astana, Atyraýdan da toıǵa tapsyrys alam ǵoı...

Tfý, mynaǵan daýa joq eken! Trýbkany tastaı saldym. Osy bir «qara" pıar degenniń talaıdan beri janymdy jegideı jep júrgenin nesin jasyraıyn. Bul bále batystan keldi. Maık Taısonnyń qulaq tistegenin, jer habar bermegir Maıkl Djeksonnyń sońynan ergen túrli qaýesetterdi, qala berdi Pýgachevanyń balasyndaı bireýlerdi baı qylǵanyna deıin «qara pıar» dep qabyldadyq. Jaı qabyldap qana qoımadyq, qazaqy bolmysqa qalaı bolsa solaı endire bastadyq. Basqalardy bilmeımin, ánshilerimiz bul máselede tipti aldyǵa ketti. Kelsin, kelmesin áıteýir, qara bastarynyń jarnamasy úshin qaıdaǵy bir bálelerdi oılap tabatyn boldy. Ony el estisin deı me, sosyn telearnalardy jaǵalap júrgenderi. Sizderdi bilmeımin, óz basym kezinde Aıgúl Imanbaeva qaryndasymnyń Altynaımen abysyn bolyp, burynǵy kúıeýimen jabysyp túsken sýretin maqtanyp jurtqa jarıa qylǵanyn «qara pıar» dep qabyldadym. «Men qazaq qyzdaryna qaıran qalam!» dep júrgen Janar Aıjanova qaryndasym da telearnalardyń birinde «qara pıardyń» qurbany bolyp, daraqy Janarǵa, jeńiltek kúlkili, jetesiz júrgizýshi obrazyndaǵy «súıkimsiz» Janarǵa aınaldy. Asqar taýdaı alyp ánshi Nurlan Abdýllındy naǵyz qazaq osy deýshi edim. Onyń da tańerteńgilik baǵdarlamada jańalyq oqyp turǵanyn kórdik kezinde. Ne aıtyp turǵanyn ózi de bilmeıdi. Bilmegen soń kúle beredi. Ózin attasy Nurlan Espanovtyń deńgeıine túsiretindeı, bul Nurekene ne jetpeıdi eken? Taǵy da sol «qara pıar» ma? Bul tizimdi odan ári de jalǵastyrýǵa bolady.Menińshe, naǵyz talantqa «qara pıardyń» da, «kók jáshikte» júrgizýshisi bolýdyń da qajeti joq. Halyq Meırambegin habar júrgizbese de jaqsy kóredi. Maqpalyn «kók jáshikten» kórmese de alaqanynda aıalaıdy. «Atyń shyqpasa, jer órte!» degendi qazaq mazaq retinde aıtqan. Mazaq bolǵandaryńyz jaramaıdy, «qara pıardy» jaqsy kóretin ánshiler! 

...Baıaǵyda ázil aıtsa da ádilin aıtatyn Álimjan áriptesim álgiler týraly bir sáýegeı sóz aıtyp edi. 

– Mynalardyń qarqyny jaman. Endi biraz ýaqytta «Jeti kúndi» ánshi júrgizetin shyǵar. Bizder – jýrnalıser jazyp berip, aýzyna salyp otyramyz sosyn...
Áı, Álekem-aı! Kóripkel shyǵarsyń! Sizderdi qaıdam, men ózim solaı bolatynyna senip baramyn...

Arman Sqabylulynyń Feısbýktegi paraqshasynan alyndy