Túrkıa basylymdary el prezıdenti Erejep Taıyp Erdoǵandy birqatar óner qaıratkerimen birge álemge tanymal transvıstıtti de aýyzasharǵa shaqyryp, birge tamaqtandy dep aıyptap otyr. Bul týraly Qamshy.kz habarlaıdy.

Prezıdent otbasy bergen aýyzasharǵa kelgender ishinde 80-jyldary jynysyn áıel dep aýystyrǵan Búlent Ersoı da bolǵan. Tipti, prezıdent otbasymen bir dastarhanda otyrǵan.

Aýyzasharǵa jınalǵandarǵa E. Erdoǵannyń ózi: «Shyndyǵynda óner adamdary men ártister elimizdiń mádenı qýaty bolyp otyr. Sizderge elimizdi halyqaralyq qaýymdastyq aldynda odan ári abyroıly etýdi tileımin», - degen tilek bildirgen.

Halyqaralyq basylymdar tańqalarlyq oqıǵaǵa sebep bolǵan Búlent Ersoı 1980 jyldarǵa deıin erkek bolǵanyn jazady. Óner sahnasynda 1971 jyly alǵashqy álbomyn jazyp, úsh jyldan soń tuńǵysh konsertin bergen.

1980 jyly ol Londonda hırýrgıalyq ota jasatyp, jynysyn áıelge ózgertti.  Alaıda, erlerdiń esimi bolyp tabylatyn Búlent atyn saqtap qaldy. Keıin ol el úkimeti salǵan tyıymǵa baılanysty Germanıada turýǵa májbúr boldy. Tek Turǵyt Ozal bılik etken tustaǵy zańnamalardyń bosańdyǵyn paıdalanyp, qujattaryn qaıta rásimdegen.

Osy kúnge deıin Ersoı 30 shaqty álbom jazyp, 10 fılmge túsken.

Búlent sondaı-aq, shoý-bıznes ókilderi arasynda bir otyrysta on eki gambýrgerdi bir-aq jeıtin erekshe qomaǵaılyǵymen de aty shyqqan.

Transvıstıtpen tabaqtas bolǵan Túrkıa basshysynyń áreketin árkim ártúrli baǵalaýda. Bireýler Erdoǵandy ıslam qundylyqtary men ulttyq dástúrge satqyndyq jasady dep aıyptasa, endi biri Batys álemi men AQSH-qa ózin adam quqyqtary men bostandyqtaryna qol suqpaıtyn demokratıashyl saıasatker etip kórsetpek deıdi.

Bir qyzyǵy B. Ersoı bir top áriptesterimen byltyr qazan aıynda da Erdoǵannyń qabyldaýynda bolǵan.