Birer kún buryn óz deńgeıinen kúrt kóterilgen Ertis ózeni qazirgi kúni Óskemen jáne Semeı qalasynyń turǵyndaryna asa qaýip týǵyzyp otyrǵan joq. Oblys basshylyǵy aıtyp ótkendeı, sý qoımasyna jınalǵan sýdy der kezinde jiberip otyrǵandyqtan, búginnen bastap ózenniń deńgeıi qaıta túsip keledi, - dep habarlaıdy Qamshy.kz SHQO ákiminiń baspasóz qyzmetine silteme jasap.

Shyǵys Qazaqstan Aımaqtyq komýnıkasıalar qyzmetinde ótken baspasóz máslıhatynda SHQO ákiminiń orynbasary Dımıtrıı Garıkov aıtyp ótkendeı, ózen deńgeıiniń kóterilýine Qytaıda jaýyn-shashynnyń tolassyz jaýýy sebep bolǵan. Keıin shekaralas aımaqtaǵy 7 bóget tolyp ketkendikten, jiberiletin sý kólemi de artqan.

– Ertis ózeniniń deńgeıi kóterilip, jaǵalaýdaǵy 57 saıajaıdy sý basty. Biraq bul saıajaılar eshbir qaýipsizdik erejelerin saqtamaı, jaǵalaýǵa jaqyn salynǵan jáne ol jerde eshkim turmaıdy. Slavskıı atyndaǵy jaǵalaýdy da sý basty. Biraq búgin saǵat 12 shamasynda sý deńgeıi 40 sm-ge tústi. Sondaı-aq, sý basýy múmkin aımaqta ornalasqan úılerden 105 azamat qaýipsiz aımaqqa kóshirildi. 18 maýsymdaǵy kórsetkishpen salystyrǵanda, kelip jatqan sý deńgeıi 1,5 esege deıin túsý kórsetkishi baıqalady. Sondyqtan birer kúnde Ertis ózeni óz qalpyna keledi degen senimdemiz, – dedi Dımırtıı Garıkov.

Aımaq basshysynyń orynbasary sondaı-aq, áleýmettik jelilerdegi Qytaıdaǵy bóget jarylǵandyǵy jaıly túrli qaýesetterge senbeýge shaqyrdy. Al beınejazbalardaǵy bógettegi tasyp jatqan sý gıdroelektrostansıadaǵy kúndelikti sýdy jiberý úrdisi ekendigin jetkizdi.

– Shúlbi, Buqtyrma sý qoımalaryndaǵy sý deńgeıi kóterilgendikten, jiberiletin sý mólsheri de artty. Sondyqtan aldyn-ala Pavlodar oblysynyń ákimdigin eskerttik. Degenmen, onyń ózi qaýip týǵyzatyndaı deńgeıge kóterilmeıdi. Al bizdiń gıdroelektrostansıalarymyzǵa jınalǵan sý keıin kerisinshe stansıanyń jaqsy jumys istep, elektr energıasyn óndirýge óz septigin tıgizedi, – dedi Dımıtrıı Garıkov