Memlekettik syılyqtyń laýreaty, jazýshy Dýlat Isabekov keshe Elbasymen júzdesip, Aqordada bolyp qaıtty. Qalamger men Prezıdent arasynda qandaı áńgime boldy? Aýzy ýáli aǵamyz memleket basshysymen ne jaıynda sóılesti? Osy saýaldar tóńireginde Abai.kz aqparattyq portalynyń tilshisi jazýshymen shaǵyn suhbat jasady.
- Dýlat aǵa, bul, árıne, dástúrli suraq: Elbasymen aralaryńyzda qandaı áńgime boldy?
- Prezıdentpen kezdesip shyqqan bette menen telearnalardyń jýrnalıseri shuǵyl suhbat alǵan boldy. Biraq olardyń meniń sózimdi úzip-julyp bergeni unamady. Men telejýrnalısterge kezdesý barysyndaǵy áńgimemizdi tolyqtaı aıttym-aý deımin. Biraq olar meniń Londonǵa shyǵarmashylyq saparmen baratynymdy, osy saparym jaıly Elbasyn qulaǵdar etkenimdi ǵana kórermen qaýymǵa jetkizdi. Budan jurt oılaýy múmkin ǵoı, myna jazýshylar tek ózderiniń qara bastarynyń ǵana qamyn kúıtteıdi eken dep.
- Sondyqtan negizgi áńgimelerińizdi Abai.kz aqparattyq portalynyń oqyrmanyna bildire otyraıyq.
- Negizgi áńgime Ýkraınanyń basyndaǵy búgingi ahýal turǵysynan órbidi. Tili týys, dini bir, tarıhı tamyry tereńge ketken, tipti bir-birinen bólip-jaryp qaraýǵa bolmaıtyn Ýkraına men Reseıdiń arasyndaǵy búgingi shıelenis meni qatty tolǵandyrady dedim Prezıdentke. Tarıhta «Kıev knázdigi» degen boldy. «Kıev – orystyń anasy» depte aıtylatyn. Mine, osyndaı baıaǵydan ilik-shatys eldiń arasy búlinip jatqanda bizdi de ártúrli oılar shyrmaýyqsha shyrmaıdy eken. Shyǵysymyzdaǵy elmen de, soltústiktegi kórshimizben de dinimizdiń, dilimiz ben tilimizdiń úsh qaınasa sorpasy qosylmaıdy. Al, elimizdiń soltústik oblystary bolsa, sol soltústiktegi kórshimizge qarap eleńdep otyratyny belgili. Bular da erteń referendýmdatyp shyǵa kelmeı me? – dedim. Prezıdent kúlip: «Aǵaıyndy ekeýi ala kóz bolyp qalsa, oǵan bizdiń qatysymyz joq qoı» dedi. Sosyn eldiń tynyshtyǵy men memleketimizdiń tutastyǵyn máńgi saqtap qalýdyń qamy bizdiki, jatpaı-turmaı alys-jaqynnyń bárimen sóılesip otyrmyz. Kimniń kókeıinde qandaı oı júr, pıǵyly qandaı –sonyń bárin qadaǵalap, baqylap otyrmyz. Elimizdiń Táýelsizdiginiń bir túıirin de jattyń qolyna bermeımiz. Men nege «tynyshtyq-tynyshtyq» deı beremin. Tynyshtyqtyń, syılastyqtyń qadirin bizdiń halyq aınalada bolyp jatqan oqıǵalar dúrmegine qarap otyryp paıymdap úlgergen shyǵar dep oılaımyn. Osy tynyshtyqtyń arqasynda aıaqqa ábden turyp alýymyz kerek. Shúkir, shekaramyzdy barlyq taraptaǵy kórshilerimizben bekitip aldyq. İshki jalpy ónip jyldan jylǵa ósip keledi. Tabıǵı resýrstarymyzdyń ıgiligin kórip bastadyq» , - dedi. Sodan maǵan kúle qarap qoıyp: «Dúke, - dep áńgimesin jalǵastyrdy, - Dúke, men eldiń tilegin, oı armanyn, maqsat muratyn jaqsy biletin adammyn. Biraq ár nárseniń óz reti bar. Bireýler til máselesin tótesinen qoıǵysy keledi. Bireýler tipiti orystildi telearnalardy jaýap tastaý kerek dep jatyr. Al, osynyń bárin bir kúnde qolǵa alaıyq ta, iske asyraıyq. Sonda ne bolady? İshimizdegi jurt daýyryqpaıdy, daý shyǵarmady deı alamyz ba? Shyǵarady. Sonyń bárin bilip, sezip otyrǵandyqtan tarazy basyn teń ustaýǵa májúbirmiz». Áńgimesin osy sózben bir qaıyrǵan Prezıden odan ári Gaagadaǵy kezdesýlerdiń mán-jaıyn baıan etti. Men de osy arada Elbasyna rızashylyǵymdy bildirdim. Memleket basshysynyń bedeli – memlekettiń bedeli. Memleketiń azýyn aıǵa bilep turǵanymen onyń basshysy darynsyz bireý bolsa, el atyna syn. «Sizdiń AQSH Prezıdenti Barak Obama sıaqty tulǵalarmen jeke kezdesip áńgimelesýińiz bizdiń kóńilimizdi tasytty. Sol jıyndaǵy saıasatkerlerden sizdiń shoqtyǵyńyzdy biz bıik kórip otyrdyq», - dep edim Prezıdent jaırańdap kúlip: «Bári de eldiń qamy ǵoı» dep bul áńgimege núkte qoıdy.
- Dýlat aǵa, siz byltyr Qazaqstan halqy assambleıasynyń quryltaıynda Mońǵolıadan kóship kelgen baýyrlarymyzdyń birazy keri kóship ketkeni týraly aıtqan edińiz? Sol másele áńgime boldy ma?
- Boldy. Elimizdegi ózge ult ókilderin qospaǵanda 11 mıllıon ǵana halqyń bar. Núreke, osy kóshi-qon jaıy qalaı bolady, mynaý Aqordamyz qonys tepken Arqa dalasynyń batysy men soltústigindegi oblystarǵa kóz alartyp, sóz qylyp jatqandar bar dep edim, Prezıdent: «Kósh toqtamaıdy, munyń bárin tereń oılap, naqty isterge qadam jasaǵaly otyrmyz, kóńilińdegi alańdy túsinemin», - dedi.
- Baıqaýmyzsha, Prezıdentte bir betburys bar sıaqty.
- Iá, Elbasynyń elge degen yqylasyn osy joly erekshe baıqadym. Úlken saıasatker ǵoı. Saıasattyń adamy aldaǵy josparynyń bárin aqtaryp tastap qarap otyrmaıdy. Biraq, bir betburystyń baryn osy jolǵy kezdesýden men de ishteı ańǵardym.
Abai.kz
