«Nur Otan» partıasy tóraǵasynyń birinshi orynbasary Muhtar Qul-Muhammed Reseıdiń «Edınaıa Rossıa» partıasynyń HÚ sezine qatysty, - dep habarlaıdy Qamshy.kz partıanyń baspasóz qyzmetine silteme jasap.
Máskeýde ótken sıeze Muhtar Qul-Muhammed «Edınaıa Rossıa» partıasynyń jetekshiligine «Nur Otan» partıasynyń Lıderi Nursultan Nazarbaevtyń atynan quttyqtaý hatty tabys etti.
Óziniń quttyqtaý hatynda Memleket basshysy Sıez delegattary men qonaqtaryna ystyq yqylasyn joldaı otyryp, Qazaqstan men Reseı halyqtaryn HHİ ǵasyrdaǵy tatý kórshilik jáne odaqtastyq týraly Kelisimmen bekitilgen strategıalyq seriktestikti dáıekti túrde damytyp otyrǵan dostyq pen yntymaqtastyqtyń san ǵasyrlyq baýyrlas qarym-qatynasy baılanystyratynyn jetkizgen. Eýrazıalyq Ekonomıkalyq Odaqtyń serpindi damýy Qazaqstan men Reseı arasyndaǵy ózara senimniń jańa deńgeıin kórsetedi.
Nursultan Nazarbaev: «Eki eldiń bıleýshi partıalary: «Nur Otan» men «Edınaıa Rossıa» arasyndaǵy ózara tyǵyz baılanys Qazaqstan-Reseı qarym-qatynasyn odan ári nyǵaıtatyn mańyzdy tetik bolyp tabylady. Jetekshi saıası kúshter arasyndaǵy dıalog – Qazaqstan men Reseıdiń barlyq salany qamtıtyn seriktestiginiń salmaqty faktory. Biz reseılik áriptesterimizben kóp josparly jáne syndarly yntymaqtastyǵymyzdy odan ári damytýǵa, partıaaralyq baılanysty jan-jaqty keńeıtip, tereńdetýge nıettimiz», – dep atap ótken.
«Nur Otan» partıasy Tóraǵasynyń Birinshi orynbasary Reseı astanasynda birqatar ekijaqty kelissózder ótkizdi.
Atap aıtqanda, Muhtar Qul-Muhammed RF Memlekettik Dýmasynyń tóraǵasy Sergeı Naryshkınmen jáne «Edınaıa Rossıa» partıa búrosy joǵary keńesiniń tóraǵasy Borıs Gryzlovpen kezdesip, partıa Kóshbasshysy Nursultan Nazarbaev kórsetip bergen «Nur Otannyń» aldyndaǵy jumystardyń basym baǵyttary jóninde sóz etti. Óz sózinde partıa Tóraǵasynyń Birinshi orynbasary Qazaqstannyń 2050 jylǵa deıingi damý strategıasyna, «100 naqty qadam» Ult Josparyna, «Nurly Jol» keńaýqymdy baǵdarlamasyna, sondaı-aq, «Álem. HHİ ǵasyr» Manıfesi, Uly Jibek jolynyń jandanýy, «Úlken Eýrazıany» qurý syndy Memleket basshysynyń qoǵam nazaryna ilingen halyqaralyq bastamalaryna erekshe kóńil bóldi.
Óz kezeginde reseılik áriptester Nursultan Nazarbaevtyń Sankt-Peterbýrgtegi halyqaralyq ekonomıkalyq forýmda jáne Tashkenttegi SHYU-nyń samıtinde sóılegen sózderiniń erekshe mańyzdylyǵyn atap ótti. Ózbekstan astanasyndaǵy basqosýda Qazaqstan Kóshbasshysy Shanhaı Yntymaqtastyq Uıymynyń basqarý bıligin qabyldap alǵanyn aıta ketken jón.
Búgin Muhtar Qul-Muhammed Japonıa lıberal-demokratıalyq partıasynyń bas hatshysymen kezdesti.
Kazýnorı Tanaka óz eliniń parlamentine jeti márte saılanǵan. Sondaı-aq, ol búginde Japonıanyń bıleýshi partıasynyń saılaýaldy shtabyn basqarady.
Kelissóz barysynda Kazýnorı Tanaka Nursultan Nazarbaevtyń táýelsiz Qazaqstannyń qalyptasýy men damýyndaǵy aıryqsha róline jáne onyń halyqaralyq arenadaǵy joǵary bedeline toqtaldy.
Máskeýde Qazaqstan-Reseı seriktestiginiń erekshe statýsy eskerilip, Reseıge kelgen barlyq otyz sheteldik partıa delegasıalary atynan Sıeziń ashylýyna oraı ótkizilgen saltanatty kezdesýde «Nur Otan» partıasy Tóraǵasynyń Birinshi orynbasaryna sóz berilgenin atap ótken jón.
