Maýsym aıynyń ortasynda AQSH Úkimeti Úndistanǵa túrli tarıhı kezeńderde zańsyz áketilgen eki júzden astam mádenı jádigerdi qaıtardy, - dep habarlaıdy Qamshy.kz «PTI» agenttigine silteme jasap.

Bul muralar Úndistan Premer-mınıstri Narendra Modıdiń AQSH-qa sapary kezinde tapsyrylǵan. Asa qundy tarıhı zattardyń kóbisi 2000 jyl burynǵy zamanǵa jatady. Keıbir jádigerlerdiń quny 1,5 mıllıon dollardan asady eken. Bul zattar tarıhtyń aýmaly-tókpeli kezeńderinde urlanyp, AQSH-taǵy qara bazarda saýdaǵa qoıylǵan jerinen quqyq qorǵaý organdary qyzmetkerleriniń qolyna túsken. Qazirgi kezde baǵaly tarıhı zattardyń on ekisi Úndistanda kópshiliktiń tamashalýy úshin arnaıy kórmege qoıylǵan.

AQSH osyndaı jolmen  óz aýmaǵyndaǵy jat jurtqa tıesili muralardyń barlyǵyn qaıtara ma? Mysaly, AQSH murajaılarynda Iraktyń 90 myń jádigeri bar eken. 2013 jyly Iraktyń Shýmer, Vavılon dáýirine tıesili 10 myń kóne zaty AQSH-tyń Kornel ýnıversıtetine berilgen. Iraktyń týrızm jáne tarıh jónindegi mınıstrligi 2003-2004 jyldar aralyǵynda 130 myń tarıhı jádigerdiń zańsyz áketilgenin málimdedi. Al mamandar urlanǵan jádigerlerdiń sany 200 myńnan asýy múmkin degen boljam aıtýda.

Osyndaıda, shet elge ketken Orta Azıalyq muralardy da izdeıtin ýaqyt jetti-aý degen oı keledi.

Dana Qamshybek