Almatyda jalǵan aqsha jasaýshylardyń qylmystyq áreketine tosqaýyl qoıyldy, - dep habarlaıdy Qamshy.kz Almaty qalalyq İİD baspasóz qyzmetine silteme jasap.

Almaty qalasynyń İİD-niń Uıymdasqan qylmysqa qarsy kúres basqarmasynyń qyzmetkerleri Almaty qalasy boıynsha Memlekettik kirister departamenti Ekonomıkalyq tergeý qyzmetiniń Kóleńkeli ekonomıkaǵa qarsy turý basqarmasynyń qyzmetkerlerimen birlesip, «Kedergi» jospary aıasynda Medeý aýdanynyń «Dýman» shaǵyn aýdanynda jedel-izdestirý sharasyn júrgizý barysynda «Nissan Cefiro»  avtokóligin ustady. Avtokóliktiń salonynda úsh er azamat bolǵan. Olardyń ekeýi buǵan deıin bógdeniń múlkin urlaý jáne buzaqylyq áreketteri boıynsha qylmystyq jaýapkershilikke tartylǵany anyqtaldy.

«Avtokólikti tekserý barysynda qoldan jasalǵandyq nyshany bar 46 dana 2 000 teńgelik banknottar tabylyp, tárkilendi. Olardyń jalpy somasy - 92 000 teńge. Budan keıin, kúdiktiniń biriniń turatyn baspanasyn tintý barysynda «IBM» markaly kompúter, qoldan jasalǵandyq nyshany bar jalpy sany - 359, al jalpy somasy - 718 myń teńge bolatyn 2 000 teńgelik banknottar, sondaı-aq, ataýly quny 2 000 teńgelik banknottar basylǵan jáne qaǵaz aqshalardyń jyrtylǵan, kesilgen bólikteri salynǵan A4 formatyndaǵy 90 dana qaǵaz tabyldy», - dedi Almaty qalalyq İİD Uıymdasqan qylmysqa qarsy kúres basqarmasynyń bastyǵy, polısıa polkovnıgi Erlan Oralbekov.  

Sondaı-aq, polısıa qyzmetkerleri jalǵan aqsha jasaý deregi boıynsha sotqa deıingi tergeý bastalǵandyǵyn habarlady. Kúdiktiler QR Qylmystyq is júrgizý kodeksiniń 128-babyna sáıkes, ýaqytsha tergeý abaqtysyna jetkizildi.