Tarazda qarýly qaqtyǵystan aýyr jaraqat alǵan naýqas aqyry aýrýhananyń jansaqtaý bóliminde jatyp qaıtys boldy, - dep habarlaıdy Qamshy.kz 31 arnaǵa silteme jasap.

Qaza tapqan azamat tapa-tal túste tártip saqshysyna oq jaýdyrǵan edi. 24 jastaǵy kúdiktige atys kezinde eki jerinen oq tıgen. Alaıda, ol oq jaraqatynan emes, asqazan jarasynyń asqynýynan ajal qushty deıdi dárigerler. 
 
Aıta keteıik polısıa men buzaqylar arasyndaǵy qarýly qaqtyǵys eki jeti buryn Tarazdaǵy 6-shy yqsham aýdanda bolǵan edi. Sol mańdaǵy myna úıge jasyrynǵan kúdikti artynan qýa kelgen polıseıge oq jaýdyrǵan. Atystan ekeýi de aýyr jaraqat alyp, aýrýhanaǵa jetkizilgen. Eki jerine oq tıgen serjanttyń jaǵdaıy áli múshkil, aq halattylar onyń aıaqtan turyp ketýi neǵaıbyl,- deıdi. Al bir ózi búkil qalany shýlatqan azamattyń beti beri qaramaı, baqılyq boldy. Moıyn jáne keýde tusyn tesip ótken oqtan onyń hali múshkil edi. Alaıda, marqumnyń ajalyna asqazan jarasynyń asqynýy sebep bolypty. İshine qan quıylyp ketken. Dárigerler onyń bul aýrýmen uzaq ýaqyttan beri aýyrǵanyn aıtady. Dál osy asqazan jarasy bolmaǵanda naýqas tiri qalýy bek múmkin eken.
- Jansaqtaý bóliminde toǵyz kún boıy jatqan naýqastyń háli tipten aýyr boldy. Biz aldymen jaǵdaıyn bir qalypqa keltirýge bar kúsh-jigerimizdi saldyq. Alaıda, asqazan jarasy asqynyp, kúrt nasharlap ketti. Barlyq qajet em-domyn der kezinde júrgizgenmen jaǵdaı osyndaı boldy, - dedi №1 qalalyq aýrýhanasy bas dárigeriniń orynbasary Erbol Ordabekov.