"Baıqońyr" ǵarysh aılaǵynan ushatyn "Soıýz" tıpindegi tasymaldaýshy zymyrannyń bólikteri túsetin jer úshin Reseı Qazaqstanǵa jylyna 460 myń dollar tóleıdi, dep habarlaıdy Qamshy.kz  Tengrinews.kz -ke silteme jasap.

Mundaı somany "Nash Kostanaı" basylymyna Qazaqstannyń ınvestısıa jáne damý jónindegi vıse-mınıstri Albert Raý aıtyp otyr. Reseılikterdiń bul tólemi tasymaldaýshy zymyrannyń qansha bóliginiń túsetinine baılanysty bolmaıdy.

"Munda másele bólikterdiń qulaý traektorıasynyń ózgerýi jaıly bolyp otyr. Iaǵnı, buryn bólikter Jezqazǵan jaqqa qulaıtyn, al endi Aqtóbe oblysynyń Yrǵyz aýdanynyń jáne Qostanaı oblysynyń Jangeldi aýdanynyń terıtorıasyna qulaıdy. Osy maqsatqa 63 myń gektar jer bólinip otyr (630 sharshy shaqyrym - Avt.): 22 myń gektar Aqtóbe oblysynda jáne 41 myń gektar Qostanaı oblysynda", - dedi sheneýnik.

"Men depýtattardyń suranysy boıynsha eki oblystyń ákimderine hat jazdym, olar bólingen qarajattyń oblysta turaqtap qalmaı, aýdan búdjetterine beriletinin aıtty, sol jaqqa zymyran qaldyqtary qulaıdy. Bul qarajat áleýmettik shyǵyndarǵa jumsalady. Men kartaǵa qaradym, ol jaqta eldi mekender kóp emes, sondyqtan sol aýdandarda turatyn adamdar áleýmettik muqtajdyqqa qarajat ala alady", - dedi vıse-mınıstr.

Albert Raýdyń aıtýynsha, qazirgi ýaqytta respýblıka parlamentinde reseılik tarappen Qazaqstan terıtorıasyndaǵy jer ýchaskesin qoldanýǵa berý týraly kelisimdi ratıfıkasıalaý boıynsha jumystar júrip jatyr. Bul aımaqtarda zymyran qaldyqtary 1-1,5 jyldan keıin qulaı bastaıdy.