Mádenıet jáne sport mınıstri Arystanbek Muhamedıuly dopıng daýyna qatysy bar sportshylardyń Rıoda ótetin Olımpıadaǵa qatysa almaıtyny týraly málimdedi, - dep habarlaıdy Qamshy.kz Tengrinews.kz -ke silteme jasap.
"Bizdiń sportshylardyń osy dopıng daýyndaǵy tizimge ilinýine qatysty... Olardyń Rıo Olımpıadasyna qatysýy týraly aıtý qıyn. Qazir olar daıyn, jastary da kelip tur. Menińshe, olar Tokıoda ótetin Oıyndarǵa qýana qatysady. Biraq qazirgi ýaqytta olar kez kelgen sporttyq jarystardan shettetildi", - dedi mınıstr Prezıdenttiń olımpıada quramasynyń sportshylarymen kezdesýinen keıin Ilá Ilın, Zúlfıa Chınshanlo, Maııa Maneza men Svetlana Podobedovanyń Rıo Olımpıadasyna qatysýy týraly suraqqa jaýap bere otyryp.
Aıta keteıik, "sportshylar Rıo Olımpıadalaryna qatysa almaı ma?" degen suraqqa mınıstr "Iá, árıne" dep jaýap berdi.
"Dopıngke qarsy ótip jatqan sharalar kóbisine túsiniksiz bolyp jatyr. Olardyń qanshalyqty ádil, qanshalyqty ádiletsiz ekeni... Biraq munyń barlyǵy senderdi alańdatpaý kerek. Senderdiń tapsyrmalaryń - jeńý, kúresý", - dedi Nazarbaev Aqordada sportshylarmen kezdesý barysynda.
Eske salaıyq, osyǵan deıin Ilınniń Londonda 2012 jyly ótken Olımpıadada alynǵan synamasynda tyıym salynǵan zattardyń bar bolyp shyqqany belgili bolǵan edi. Sonymen qatar, qazaqstandyq taǵy úsh aýyratlettiń qanynan dopıng tabylǵan bolatyn. Iaǵnı Maıa Maneza, Zúlfıa Chınshanlo, Svetlana Podobedova da jazǵy oıyndarǵa qatyspaýy múmkin. Keıin Ilınniń 2008 jylǵy Beıjiń Olımpıadasyndaǵy dopıng-synamasy tyıym salynǵan zattyń baryn kórsetti. Ilın bolsa dopıng qoldanǵanyn úzildi-kesildi joqqa shyǵaryp otyr.
