Álimjettik áreket áskerde ǵana emes balabaqshaǵa da jetti. Tarazdaǵy №1 balabaqshada nebári eki jastaǵy búldirshin kók ala qoıdaı sabalǵan. Kishkentaı Artemniń anasy balasynyń ólim aýzynan qalǵanyn aıtady, - dep habarlaıdy Qamshy.kz 31 arnaǵa silteme jasap.
Ábden taıaq jegen bala basyn kórpege búrkenip jatqan jerinen tabylǵan. Ala, Artemǵa "saýsaǵymyzdyń ushyn da tıgizbedik" dep ant-sýyn ishken tárbıeshiler, balany urǵan biz emes deıdi. Aıtýlarynsha, eki jastaǵy búldirshindi tepkilegen eresek toptyń alty jastaǵy balasy.
Kózi kógerip, qulaq shekesi men bet-aýzy túgel qantalaǵan kórinis tórt kún buryn bolǵan. Dese de jaraqat izi áli jazylmapty. Soǵan qarap Artemniń ata-anasy balasy aıaýsyz soqqynyń astynda qalǵanyna senimdi. Sol kúnnen beri jıi jylaýdy shyǵarǵan búldirshin, túni boıy typyrshyp shoshyp oıanatyn boldy deıdi anasy. Al bala ózine jábir kórsetýi múmkin adamnyń esimin jatqa biledi eken.
FATIMA AHMETOVA,Taraz qalalyq №1 bala-baqshasynyń ádiskeri:
- Árıne tárbıeshi kináli? Qaramaǵan, baıqamaǵan.
Bolǵan jaıdy balabaqsha basshylyǵy tek boljap aıtady. Óıtkeni tárbıeshisiniń ózi oqys oqıǵa týraly ár qıly túsinik berdi,- deıdi ata-ana. Artemniń anasynyń aıtýynsha, eresek toptaǵy alty jasar bala ulyn jatyn bólmege aparyp soqqyǵa jyǵýy múmkin.
OLGA ANDRONOVA, Artemnyń anasy:
- Tús áletinde telefonyma osy balabaqshanyń «Kún shýaq» tobynda oqys oqıǵa bolǵany jaıynda tárbıeshi habarlasyp tutqany qoıa saldy. Janushyra jetkenimde balamnyń bet-aýzynda saý jeri qalmaǵanyn kórdim. Tárbıeshi túski asta Artemdi tappaı qalǵanyn aıtty. Kelesi jatyn bólmede basyn búrkenip, kórpege tyǵylǵan kúıinde taýyp alypty.
Artemniń anasy bul jaǵdaı áldeqaıda erte bolǵanyna senimdi. Ózin bolǵan is bolyp, boıaýy sińgen soń ǵana shaqyrǵan deıdi. Balabaqsha qyzmetkerleriniń jedel járdem shaqyrdyq dep jalǵan aıtqanyna ashynady. Al tártip saqshylarynyń áreketi tipti yzasyn týdyrǵan. İsti tergeýdiń ornyna, jyly jaýyp qoıýǵa jata-jastanyp jalbaryndy,- deıdi. Oqys jaıttan soń aıaq asty búldirshinder úıiniń meńgerýshisi eńbek demalysyna shyǵyp ketse, tárbıeshi densaýlyǵyna baılanysty kelýdi qoıypty. Al alty jastaǵy balanyń kishi topta ne istep júrgeni sol kúıi belgisiz.
FATIMA AHMETOVA, ádisker:
- Ony maǵan da aıtpaǵan, meńgerýshige de aıtpagan. Ózim bilemdilikke salǵan.
Artemniń anasy sala mamandarynyń salǵyrttyǵynan balam psıhologıalyq soqqy aldy deıdi. Basqa balanyń basynda qaıtalanbas úshin jaýaptylardyń jumystan ketýin talap etedi. Qazir bul ispen prokýratýra aınalysýda.
