Almatyda arnasynan asqan ózen 150 úıdiń aýlasyn shaıyp ketti. №2 jylý elektr stansıasynyń mańynda ornalasqan úsh qubyrdyń ekeýi qoqysqa tolyp, sý úlken qysymmen ótipti. Saldarynan tómenirek ornalasqan saıajaıdaǵy jurttyń aýlasy sýǵa tolyp, kópirler qıraǵan, - dep habarlaıdy Qamshy.kz KTK arnasyna silteme jasap.
Qazir munda arnaıy tehnıkanyń ózi ázer ótedi. Turǵyndardyń aıtýynsha, jaǵdaıdyń ýshyǵýy ózen ańǵaryn jóndeýden keıin bastalǵan. Jaǵalaýdy nyǵaıtamyz degen shendiler, isti shala atqaryp, arnany taryltyp tastapty.
Keshe tús qaıta Qarǵaly ózeni qalanyń tómengi bóligindegi qos saıajaı turǵyndarynyń tynyshtyǵyn buzdy. Arnasyna syımaǵan sý syrtqa tógilip, jan-jaqqa jaıylǵan. Buǵan №2 jylý elektr stansıasynyń mańyndaǵy dıametri 1 metrlik úsh qubyrdyń ekeýi qoqysqa tolyp qalýy sebep bolypty. Jalǵyz qubyrdan ótken laı sýdyń jyldamdyǵy artyp, jurttyń baspanasyna deıin kirgen.
Abat Ibraımov, saıajaı turǵyny:
– 10 mınýtqa jetken joq úıdiń ishine sý kirip ketti.Tehnıka, jıhazdyń barlyǵyjaramsyz bolyp qaldy. 2 saǵat boıy óz kúshimizben arpalysyp kórdik, esh nátıje shyǵara almadyq. Nege deseńiz sý qatty keldi!
«Teploenergetık» pen «Energostroıtel» saıajaı birlestikterindegi 150 úıdiń baý-baqshasy sý astynda qaldy. Kishigirim kópirler de qırap, joldar mı batpaqqa aınalǵan.
Ózen arnasyn abattandyrý kezinde betondaý jumystary men temir torlarǵa toltyrylǵan tastar paıdalanylǵan bolatyn. Joǵarǵy jaqta jaǵdaı qalypty, biraq aǵyndy sý ekpinmen kelgen kezde myna temir torlardyń tas-talqanyn shyǵaryp, sý aýlalarǵa jaıylǵan. Arnaǵa syımaǵan sý saıajaı birlestiginiń tómengi bóliginde ornalasqan myna saıǵa jınalýda. Saǵat sanap bul jerdegi jaǵdaı qıyndaı túsken. Sebebi, saıdan shyǵar jol tappaǵan sý osy jerde turaqtap, onyń deńgeıi kóterilýde.
Bul saıajaılar 2012 jyly ǵana Alataý aýdanynyń quramyna kirip, ákimdik birinshi kezekte ózen men aryqtardy jóndeýge kirisken eken. Biraq atqarylǵan jumys sapasy jergilikti turǵyndardyń kóńilinen shyqpaı tur.
Olga Pankovskaıa, saıajaı turǵyny:
-Buryn ózen sekýndyna 11 tekshe mert sý ótkizse, qazir nebári 5 tekshe metr ótedi. Bul qurylys kezinde tehnıkalyq talaptardyń saqtalmaýynan boldy. Ákimdik jumystardy gıdrotehnıkadan habary joq adam júrgizgenin moıyndap otyr. Qaıta jóndeımiz dep júrgenderinde bizdi osymen 8-ret sý basty.
Qazirgi tańda apatty aýdanda tótenshe jaǵdaı departamentiniń mamandary jumys júrgizýde. Biraq jumyldyrylǵan tehnıka men qutqarýshylary sanyna qaraǵanda bul uzaqqa sozylatyn sekildi.
Tımýr Tileýberdıev, Almaty qalalyq qutqarý qyzmetiniń bólim bastyǵy:
–8 motopompa, 2 ekskavator, 2 samosval Kamaz, 3 ekıpaj qutqarýshylar jumys istep jatyr. 8 pompany 8 úıge qoıdyq, úılerine sý kirýi múmkin jerlerge. Al qalǵan aýlalar kezekpen alynady.
Motopompapen sorylǵan sýdyń ornyn nóser jaýyn buryńǵy deńgeıge qaıta kóterýde. Al qum toltyrylǵan qaptar men ýaqytsha bógetter oıdaǵydaı nátıje bermeı otyr. Jaqyn mańda týystary bar jurt sol jaqqa kóshse, keıbireýler tilsiz jaýmen kúresý úshin baspanasynda qalǵan. Al aýa-raıyn boljaýshylar jaqyn kúnderi jaýynnyń jalǵasatynyn habarlady. Sondyqtan Almaty men onyń mańaıy qaıtadan sý astynda qalý qaýpi saqtalýda.
