Polıseıdiń betine zár shashqan júrgizýshi qylmystyq kodekstiń 6 baby boıynsha sot aldynda jaýap beredi, - dep habarlaıdy Qamshy.kz Tengrinews.kz -ke silteme jasap.
"Qylmystyq is sot tóraǵasy Marat Kókishevtiń qaraýyna tústi. Proses áli taǵaıyndalmady, sebebi sottalýshynyń advokaty Elýbaevtyń (sottalýshy - Avt.) aýyryp jatqanyny aıtty. Ol qylmystyq kodekstiń alty baby boıynsha sot aldyna keledi. Olar: "Buzaqylyq" babynyń 1-bóligi, "Bılik ókiline baǵynbaý" babynyń 1-bóligi, "Bılik ókilin qorlaý" babynyń 1-bóligi, "Bılik ókiline qatysty kúsh qoldaný" babynyń 1-bóligi, "Buzaqylyq" babynyń 2-bóliginiń 2-tarmaǵy", - dep habarlady sottyń keńsesindegiler.
Sottalýshy Qaırat Elýbaev óz kinásiniń joqtyǵyn aıtyp otyr. Ol polıseıge zár shashpaǵanyn málimdedi. "Qajet bolsa men bıologıalyq saraptamadan óte alamyn", - dep málimdedi Elýbaev. Qazir ol bostandyqta. Ol kepilaqymen bosatylǵan edi.
Eks-polıseı Tólegen Igibekov sottasyp, jumysqa qaıta turýǵa jáne shartty túrdegi jaza merziminen qutylýǵa tyrysatynyn habarlady. "Men kasasıalyq shaǵym daıyndadym, taıaýda sotqa joldaımyn. Jumysyma oralǵym keledi, men qyzmettik mindetimdi atqardym ǵoı. Elýbaevqa kelsek, onda meniń isim joq. Ony sot jazalasyn", - dep málimdedi Igibekov. Ol ázirshe jumysqa turmaǵanyn aıtty. Aıtýynsha, shartty merzimdegi jazasy bar adamǵa jumys tabý qıyn.
Eske salaıyq, qalalyq jol-patrýldik polısıasynyń qyzmetkeri mas júrgizýshini shapalaqpen urǵany úshin sottalǵan bolatyn. Júrgizýshi qanynda tabylǵan alkogóldi kórsetken kýálandyrý qorytyndylarymen kelispeı, zárin serjantqa shashyp jibergen. Osy kezde serjant ony shapalaqpen urǵan. Keıin polıseı bes jylǵa shartty túrde sottalǵan edi. İshki ister mınıstri Qalmuhamet Qasymov betine zár shashylǵannan keıin júrgizýshini shapalaqpen urǵany úshin bes jylǵa sottalyp ketken jezqazǵandyq polıseıdiń isi boıynsha Joǵarǵy sotqa hat jazǵanyn aıtqan bolatyn.
