Memleket qarajatyn jymqyrdy, jalǵan kásipkerlikpen aınalysyp, salyq tóleýden jaltardy degen aıyptar taǵylyp, úı qamaqqa alynǵan Qazaqstan jýrnalıser Odaǵynyń tóraǵasy, Ulttyq baspasóz klýbynyń basshysy Seıitqazy Mataevqa taǵylǵan aıyptar alaıaqtyq jáne salyq tóleýden jaltarý baptaryna aýystyrylǵan. Bul týraly ákeli-balaly Seıitqazy jáne Áset Mataevtardyń advokattaryna silteme jasap Qamshy.kz habarlaıdy.
«Bizde alǵa jyljý bar. Sansyz ótinishter, shaǵymdar nátıjesinde Áset jáne Seıitqazy Mataevtardyń jáne memlekettik qyzmetshilerdiń áreketteri basqa bapqa aýystyryldy. Bul – az da bolsa alǵa jyljý. Baptar birshama jumsarǵan, biraq, qorǵaýymdaǵylar ózderin múlde kinásiz sanaıtyndyqtan bul áli eshteńe de emes», - deıdi advokat Mádına Bakıeva.
Sonymen S. Mataevqa qazir 1997 jylǵy Qylmystyq kodekstiń 177-baby, 4-bólimi, «b» tarmaǵy boıynsha – «Alaıaqtyq, ıaǵnı bótenniń múlkin urlaý nemese aldaý, senimin paıdalaný arqyly bótenniń asa iri kólemdegi múlkin tonaý», 245-bap, 3-bólim boıynsha «Mindetti deklarasıa tapsyrýdan bas tartý arqyly asa iri kólemde salyq tóleýden jaltarý», 190-bap, 4-bólim, 2-tarmaq boıynsha «Alaıaqtyq, qyzmettik jaǵdaıyn paıdalana otyryp jasalǵan, aldaý jáne senimdi paıdalaný arqyly memlekettik satyp alýlar salasynda iri kólemdegi tonaý áreketi» degen aıyptar taǵyldy.
Sońǵy bap boıynsha S. Mataevtyń uly, «KazTAG» JSHS basshysy Áset Mataevqa da aıyp taǵylyp otyr.
Advokattar úsh aı merzim ishinde Ulttyq baspasóz klýby men QazTAG agenttiginiń bes jyldyq qujattaryn qaıta kótergenderin, aýdıt júrgizilip, tólenbegen salyqtyń qylmystyq jaýapkershilik kózdelgen mejege jetpeıtinin anyqtaǵandaryn aıtady.
«Búginde Ulttyq baspasóz klýby búdjetke salyq retinde tóleýi tıis soma 2011-2015 jyldar aralyǵyndaǵy jeke tabys salyǵy boıynsha 35 986 myń teńgeni quraıdy. Korporatıvti tabys salyǵy bolsa 5 890 myń teńge boldy. Munda salyq tóleýden jaltarý boıynsha qylmys quramy joq. Munda ákimshilik quqyqbuzýshylyq qana bar», - deıdi Mataevtardyń qorǵaýshysy Andreı Petrov. Sondaı-aq, qorǵaýshylar anyqtalǵan osy somalardyń barlyǵy tergeý kezinde memleketke tólengenin aıtady.
Osy is boıynsha aqparat salasyna jaýapty memlekettik mekemelerdiń de birqatar laýazymdy tulǵalary tergelip jatqany belgili. Kezinde QR Investısıa jáne damý mınıstrligine qaraǵan Aqparat, baılanys jáne aqparattandyrý komıtetiniń burynǵy tóraǵasy Talǵat Qazanǵap, QR Joǵarǵy soty aqparattyq qamtamasyz etý bóliminiń jetekshisi Bolat Kalánbekov, burynǵy aqparattandyrý jáne baılanys komıtetiniń basshysy Bolat Bersebaev, komıtet tóraǵasynyń orynbasary Bek Arpabaev, «Qazaqtelekom» AQ strategıalyq basqarý jónindegi bas dırektor Batyr Mahanbetajıevten eshqaıda ketpeý týraly qolhat alynǵan. Burynǵy aqparat komıtetiniń taǵy bir qyzmetkeri (Merizmdi BAQ basqarmasynyń bastyǵy – red.) Janbolat Baıbosynovqa kepilzat túrindegi bultartpaý sharasy qoldanylǵan.
Mataevtardyń qorǵaýshylary bul memlekettik qyzmetkerlerge qatysty aıyptar da Qylmystyq kodekstiń 307-babyna, «Laýazymdyq mindetterin shamadan tys paıdalaný», aýystyrylǵanyn aıtady.
Esterińizge salsaq, 22 aqpan kúni Jemqorlyqqa qarsy is-qımyl jónindegi Ulttyq búro Almaty departamentiniń qyzmetkerleri S. Mataev pen onyń uly Áset Mataevty tutqyndap, olardyń ústinen qylmystyq is qozǵalǵanyn habarlaǵan. Keıin kúdiktilerge qatysty úı qamaqqa alý bultartpaý sharasy qoldanyldy.
Advokattar men aıyptalýshylardyń ózderi tergeý málimetterimen kelispeı, Ulttyq búro qyzmetkerlerin tergeý qupıalaryn BAQ-qa jarıa etti dep te aıyptaýda.
Úlken saıasat týraly kesek áńgimeler aıtatyn keıbir saıasatkerler men táýelsiz BAQ Mataevtarǵa qatysty qozǵalǵan bul qylmystyq istiń túpki nysany uzaq jyldar boıy "Qazaqtelekom" AQ, eldiń aqparat jáne baılanys, komýnıkasıalar jónindegi mınıstrlikteri men agenttikterin basqarǵan Asqar Jumaǵalıev bolǵanyn aıtady. Bılik bıigindegi múddeli toptar Jumaǵalıevti jyǵý úshin á degende onyń ózin bas salmaı, aınalasyndaǵylardy bir silkip alý ádisin qoldandy deıtinder bar. Mundaı tásil jemqorlyqpen kúres mamandarynyń synynan ótken senimdi ádis kórinedi. Al, sol ózine jasyryn soǵys bastaldy degen Asqar Jumaǵalıev, búginde "Qazatomóndiris" ulttyq kompanıasynyń basqarma tóraǵasy, naýryz aıynda Elbasynyń qabyldaýynda bolyp, kompanıanyń jumysy jaıly esep berdi, aldaǵy josparlarymen bólisti, Prezıdentten tıisti tapsyrmalar aldy. Biletinder bul resmı kezdesýdiń astarynda mán bar ekenin, A. Jumaǵalıev ózine bastalǵan shabýyl týraly Prezıdentti habardar etýi múmkin degendi de aıtyp júr. Qalaı bolǵanda da sol kezdesýden soń Mataev isinde jemqorlyqpen kúres qyzmetiniń alǵashqy qarqyny báseńdep barady. Aıyptaýlar jeńildetilip, kúdiktilerdi tergeý aıaqtalmaı, sot úkimi shyqpaı jatyp jeksuryn etip kórsetetin BAQ materıaldary sap tyıyldy. Soǵan qaraǵanda, A. Jumaǵalıevti jarǵa jyǵamyz degenderdiń jymysqy jospary kúl-talqan bolǵan sıaqty. Al, A. Jumaǵalıevtiń saıası sahnadaǵy "janazasyn shyǵarý" úshin qajet bolǵan Mataevtarǵa qatysty is te bastapqy maqsatynan qaıtyp, kúdiktilerge "uıalǵan tek turmastyń" kerimen jeńil-jelpi bir jaza belgilenýi bek múmkin.
Darhan Muqantegi
