Aqtóbede ótken aptada dúnıege kelgen tórt aıaqty balanyń jynysy anyqtalmaı jatyr, - dep habarlaıdy Qamshy.kz Aktobetimes.kz -ke silteme jasap. 

Ótken aptada ómirge tórt aıaqty náreste keldi. Al jetilmeı qalǵan egiziniń keı aǵzalary onyń denesine jabysyp týǵan.

"Iá, balada tórt aıaq bar. Onda damý kemshilikteri kóp. Balanyń jynysy týraly dóp basyp aıtý da ázirge múmkin emes, onyń ústine bul bastapqy qajettilik emes", - deıdi Oblystyq balalar klınıkalyq aýrýhanasynyń bas dárigeri Nurlan Qojın.

Beısenbi kúni nárestege alty kún bolady. Sábıdiń ómirin uzartqan ota – kolostomıa boldy. Bala áli jansaqtaý bóliminde. Al aıaqtaryna ota jasaý ázirge erte.

Onyń ne sebepti bulaı dúnıege kelgeni belgisiz. Buǵan ekologıa da, anasynyń júktilik kezinde syrqattanýy da áser etken bolýy múmkin. Sebebi oblysta aýytqýshylyqtarmen dúnıege kelgen sábılerdiń sany artyp ketken.