Tabıǵattyń tosyn minezinen tórt túlik mal qyrylyp jatyr. Ońtústik Qazaqstan oblysynda nóserli jaýynnan ózen sýy arnasynan asyp, bir tabyn jylqyny aǵyzyp ketti. Oqys oqıǵa Ál-Farabı aýdanyndaǵy Tekesý aýylynda bolǵan. Qazir qutqarýshylar aram qatqan jylqylar jaǵalaýǵa shyǵarylyp, jalpy shyǵyn kólemi esepteýde, - dep habarlaıdy Qamshy.kz KTK arnasyna silteme jasap.
Shelektep quıǵan jaýyn ońtústiktiń turǵyndaryn shash etekten shyǵynǵa batyrdy. Keshe kúndiz bastalǵan nóser jaýynnyń arty burshaqqa ulasyp, Tekesý aýylynyń mańyndaǵy ózen sýy arnasynan asyp ketken. Sonyń saldarynan jaıylymda júrgen bir úıir jylqy men iri qara sýǵa ketti. Iaǵnı naızaǵaıdyń jarqylynan shoshyǵan janýarlar jan-jaqqa bytyraı qashyp, sý qoımasyna qulap ketken.
Baqyt Asambaev, jylqyshy:
-İnim ekeýmiz edik qaıtara almadyq. Burshaqtan jel qatty bolyp ketti. 10-15 mınýtta dala qap qara bolyp ketti ǵoı. Ie bola almadyq.
Qazir qutqarýshylar aram qatqan ólekselerdi sýdan shyǵaryp jatyr. Tabıǵattyń tosyn minezinen barlyǵy 17 bas jylqy, eki syıyr men usaq mal qyrylǵan. Endi onyń ótemaqysyn kimniń tóleıtini belgisiz. Tipti aýyl turǵyndarymen kezdesken atqaminerler de ázirge mardymdy jaýap bere almaı otyr.
Baýyrjan Qaljan, Ál-Farabı aýdanynyń ákimi:
-Tótenshe jaǵdaıǵa baılanysty arnaıy komısıa qurylady. Olar apattyń naqty sebebin anyqatýy tıis. Tek sodan keıin ǵana ótemaqy tóleý máselesin qarastyramyz.
Aıaq astynan bastalǵan jaýyn aýyldyń da astań kesteńin shyǵarǵan. Iaǵnı dúleı daýyl men burshaqtan aǵashtar qulap, gaz qubyrlary búlindi. Sondyqtan aýdan basshylary qazir shyǵyn kólemin eseptep, aram qatqan iri-qaranyń ólekselerin joıýmen aınalysyp jatyr.
