Oraldyqtar qantty endi tek túsinde ǵana kóretin bolǵan. Óıtkeni bir jetiden beri óńirdegi saýda oryndary men dúken sórelerinde sheker atymen joq. Tátti ónim keı jerlerde bolǵanymen baǵasy aspandap ketken. Eń qajet maýsymda qumshekerdiń qol jetimsiz bolýy jurtty ashyndyryp otyr, - dep habarlaıdy Qamshy.kz KTK arnasyna silteme jasap.

Oraldyqtar bir aptadan beri babyn keltirip sháı ishe almaı júr. Sebebi óńirdegi dúken sórelerinde sheker tapshy.

Svetlana Lebedeva, dúken ákimshisi:

-Qant qolda joq. Qymbattaýyna baılanysty tasymaldaýshylar fırmalarda da joq deıdi. 

Kóterme saýda oryndary da jutap otyr. Jýyq arada bolǵan kúnniń ózinde, baǵasy aspandap keteri aıtpasa da túsinikti. Keıbir bazarlar men iri saýda oryndarynda qant bolǵanymen, kóp alýǵa shekteý qoıylypty. 

Mergen Jumalıev, satýshy:

-Bes keli ary ketse on keli ǵana sheker beriledi. Aıtýlarynsha qoımada qant joq. Bunyń sońy qymbatshylyqqa ákep soǵýy múmkin. Álbette oǵan halyq narazy.    

Tátti ónim eń qajet kezde kózden bulbul ushty. Qazir eldiń jemis-jıdekti jıyp, qysqa qamdanatyn shaǵy. Sondyqtan buqara shekerdiń baǵasy qansha aspandasa da ony alaýǵa daıar. Alaıda, jurt qant tappaı tentirep júr. 

Nadejda Stanskova, Oral qalasynyń turǵyny:

-Qaıbir jyldary osyndaı bolǵan. Bul endi shekten shyqqandyq. Qazir ónim jınap, qysqa ázirlenetin kez. Dál osy kezde qasarysqandaı qant joǵalyp ketedi. Qymbat baǵaǵa ta taba almadym.

Oralda jylda jaz maýsymynda sheker tapshylyǵy sezilip, artynsha onyń baǵasynyń ósýi ádetke aınalǵan deıdi turǵyndar. Osyǵan deıin bir keli qant 235 teńge bolsa, qazir 300 teńgege bir-aq kóterilipti.