Qaraǵandyda birneshe kúnniń ishinde úsh bala joǵalyp ketti, - dep habarlaıdy Qamshy.kz Tengrinews.kz -ke silteme jasap.

11 jastaǵy Aqarys Tileýke men 10 jastaǵy Aıan Medınov 6 shildede Qaraǵandy oblysy Aqtas aýylynda joǵalǵan. Eriktilerdiń málimetinshe, balalardyń joǵalǵany týraly habardy polısıaǵa ákesi bergen. Balalar túske deıingi ýaqytta oınap júrip, ketip qalǵan. Osydan keıin olardy eshkim kórmegen.   

"Balalardyń joǵalǵany týraly málimet bizge polısıadan kelip tústi, sebebi biz olarmen birge jumys isteımiz. Qazir biz eriktiler tobyn quryp jatyrmyz. Ázirshe qansha adam ekenimizdi aıta almaımyn", - dedi eriktilerdiń biri Andreı Hlashev.  

Joǵalǵan balalardyń belgileri: Aqarys Tileýke - 2005 jylǵy. Boıy 125 santımetr, aryq kelgen. Shashy ashyq reńkti, kózi qońyr. Jasyl sporttyq kúrte kıgen, shalbary qara, fýtbolka men qara krosovka. 

Aıan Medınov - 2006 jylǵy. Boıy 110 santımetr, aryqtaý kelgen. Shashy qara, kózi qońyr. Qara kúrte kıgen, shalbary qara, qara krosovka.

Munymen qatar, taǵy bir balanyń joǵalǵany belgili boldy. 6 jastaǵy Darıa Pahataeva 4 shildede Qaraǵandydaǵy 33-shahta mańynda joǵalǵan. Ol tańǵy ýaqytta úıinen shyǵyp ketken, ony sońǵy ret mekteptegi balalar alańynda kórgender bar. Osydan keıin ol úıine oralmaǵan. Týystary polısıaǵa 6 shildede habar bergen. Qyzdyń belgileri: boıy 110-115 santımetr. Kózi sur, shashy ashyq, qysqa. Betinde sekpil bar. Oń ıyǵynda ıt tistegennen iz bar. Kók djıns, qyzyl tústi aıaq kıimi bolǵan.