«Evrazıa» arnasynyń kórermendi ǵana emes, Qazaqstandy mazaq etken kezekti qoıylymy taǵy da arna efırinde jalǵasty.
«Evrazıa» arnasynyń basshylyǵy bul joly efır arqyly qazaq tilin mazaq qylǵysy keldi me, álde arnada qazaq tilin biletin birde-bir mamannyń joqtyǵy ma, áıteýir efırde «shala qazaqtyń» jazýy jazyldy.
Kúni keshe Astana kúnine oraı jańalyqtar qyzmeti usynǵan beınematerıalda eki sózden eki qate jiberip, qala kúnine «tosyn syı» jasap jiberdi.
El eńsesi – Elorda emes, «Elrda» ekenin aıtqysy kelgen arna basshylyǵy «salatanaty» jarasqan Astanany mereıtoıymen osylaı erekshe quttyqtaǵysy kelgen sıaqty.
Ózderin №1 arna sanaıtyn “Evrazıa” arnasy bas taqyryptyń ózinen óreskel qate jiberip, Elorda degen bir sózdi durys jaza almaı, «ELRDA EŃSESİ – EL EŃSESİ» deý arqyly eldiń eńsesin túsire almasy anyq. Sáýlet-saltanaty kelisken qalanyń SALATANATYN kelistirgen tilshiler men redaktorlar qaı arnada qyzmet etse de, óz tilin qurmettemeıtin bireý bolsa kerek-ti.
Áıtpese, jańalyq efırge shyǵardyń aldynda tilshi jazǵan materıal qanshama adamnyń (shyǵarýshy redaktor, redaktor, prodússer) aldyna baryp, súzgiden óteri qarapaıym jurtqa aıtpasa da túsinikti nárse. Endeshe óreskel qatelerdi «baıqamaı» qalǵan arna ujymy qazaq tilin taptaǵanymen qoımaı, ózderiniń tym saýatty ekendikterin kórsetti.
Saýaty jetispegen arna ujymynan kásibı biliktilikti talap etýdiń ózi kúlkili. Osy oraıda, kúlli qazaqtyń namysyna tıgen arnanyń álgi qylyǵy... Jer máselesi kezinde de ortaǵa búlik tastap, artynan óz isterin jýyp-shaıǵan da osy arna bolatyn. Jerdi satý men jalǵa berýge qarsy mıtıń qatysýshylaryna áldebir syrtqy kúshterdiń 150 AQSH dollarynan taratyp jatqanyn senimmen habarlaǵan edi. Al sosyn bul qoǵamda úlken daý týdyryp, artynan óz áreketterin «jýyp-shaıǵan» «Evrazıa» arnasy endi kelip tilimizge «túkirip» qalypty.
Qazaq tilin kerek etpeıtin arna qazaqqa da kerek emes. Kórshiles Reseı Federasıasynyń arnasy qazaq tildi tilshilerin oqytyp alsyn, áıtpese memlekettik tilde qate jazyp efırge jibergen áreketterin eshnárse aqtaı almaıdy.
El arasynda qadyr-qasıeti qalmaı bara jatqanyn túsinetin basshylyǵy bolsa, arnanyń ishki jaǵdaıyn taǵy bir rettep alǵany jón.
Indıra Qýat
