18 shilde kúni Almatyda bolǵan teraktide qolǵa túsip, keıin İİM Q. Qasymov «polısáǵa jasalǵan shabýylǵa qatysy joq taksıshi eken» degen azamat ta kúdikke ilinip otyr. Polısıa ustaǵan sátte onyń qaltasynan Erjan Qoshaev degen azamattyń jeke bás kýáligi men dinı mazmundaǵy mátin jazylǵan qaǵaz tabylǵan,  - dep habarlaıdy Qamshy.kz 365info.kz – ke  silteme jasap.

Portaldyń jazýynsha jýrnalıs Serik Joldasbaı Erjan Qoshaevqa qatysty málimetterdi zerttegen. osy suraqqa jaýap izdegen eken. S. Joldasbaı óziniń áleýmettik jelidegi paraqshasynda jýrnalıs «Erjannyń salafıt bolýyna kim kináli?» degen suraqqa jaýap izdepti.

– Almatydaǵy qyrǵynda qolǵa túsken ekinshi kúdikti Erjan Qoshaevtyń Vkontakte áleýmettik jelisindegi paraqshasyna kirip, qarap shyqtym. Ol sońǵy ret VK-ǵa keshe saǵat 14:18 kirgen eken. Atalǵan áleýmettik jelide Erjan biryńǵaı dinı mazmundaǵy jazbalarmen bólisip otyrǵan, – deıdi jýrnalıs.

Alaıda, Serik Joldasbaıdyń aıtýynsha, osydan úsh jyl buryn ǵana Erjan qazaqsha hıt ánderdi tyńdap júrgen, ony ándi oryndaǵan ánshilerge «jaraısyń» dep maqtaý sóz aıtqan azamattardyń biri bolǵanyn baıqaýǵa bolady.

– Sondaı-aq ol biryńǵaı dinı ýaǵyzdar tyńdamaı nemese oqymaı, jelide ártúrli oıyndar oınaǵan. Eń alǵash ret Erjan 2014 jylǵy 24-mamyr kúni Qurannan úzindi jarıalaǵan eken. Alaıda, ol 2015 jyldyń 27-naýryzyna deıin taǵy da ártúrli oıyndar oınaǵan sıaqty. Dál osy kúnnen bastap, biryńǵaı dinı mazmundaǵy jazbalardy bólisip, jarıalaı bastaıdy, – deıdi Serik Joldasbaı.

Eń qyzyǵy,Erjan VK áleýmettik jelisinde Daryn Mýbarovtyń paraqshasyna tirkelip, onyń ýaǵyzdaryn tyńdap júrgen.

Jýrnalısiń sózine qaraǵanda, ol Darynnyń «Jannat pen Tozaq» vıdeoýaǵyzyn bólisken eken.  

– Demek, onyń sáláfılik jolǵa túsýine Daryn Mýbarovtyń yqpaly basym bolyp tur. Sondyqtan da quzyrly organ ózin Darynnyń shákirti sanaıtyn kez kelgen adamdy qaýipti sanap, olardy arnaıy tirkeýge alýy kerek, – dep túıindeıdi Serik Joldasbaı.

Sondaı-aq, polısıa quryqtaǵan kezde Erjan Qoshaevtyń qaltasynan dinı jazýlar jazylǵan bir japyraq qaǵaz tabylǵan bolatyn. Bul óz kezeginde áleýmettik jelide keńinen talqylanyp, kúdiktiniń dinı aǵymdardyń birine qatysy bary aıtylǵan edi. Atalǵan máselege dintanýshylar men ımamdar da beıjaı qaramaǵanǵa uqsaıdy. 

Solardyń biri — ımam Ismaıyl Seıitbekov kúdikti Erjan Qoshaevtyń qaltasynan tabylǵan jazba sáláfı aǵymynyń aqıdasy boıynsha kálımanyń 7 sharty ekenin aıtyp otyr. 

«Búgingi Almatydaǵy terrorlyq áreketti jasaǵandar sáláfıtter ekeni taǵy dáleldendi. Sáláfıtter ózderin sýdan taza, sútten aqpyz, terrorlyq áreketti jasaıtyndar tákfırler dep, tákfırlerdi jamandaýǵa kirisedi. Al, ustalǵan jigittiń qaltasynan shyqqan qaǵazda Muhammed ıbn Abdýlýahhab negizin qalaǵan ýahhabı, sáláfı aǵymynyń aqıdasy boıynsha. kálımanyń 7 sharty jazylǵan.

Sáláfıler sol sharttarǵa sáıkespegen adamdy musylman sanamaı kápirge, adasqanǵa shyǵarady.

Paıǵambarymyzdyń (s.a.ý.) hadısinde mundaı 7 shart joq jáne eshbir janǵa ıslamdy qabyldar kezinde mundaı talap qoımaǵanyn bilemiz. Áhlý súnnet senimi boıynsha Lá ıláhá ıllalah Mýhammadýr rasýlýllah degen adam musylman sanalady. Sol qaǵaz lańkes jigittiń sáláfı ekenine naqty dálel dep sanaımyn. Buǵan sáláfıler ne ýáj aıtar eken?», — deıdi ımam Ismaıyl Seıitbekov óz sózinde.

Kúdikti qolǵa túsken kezde halyknews.kz saıty onyń qaltasynan tabylǵan qujattyń jalǵan ekendigi týraly málimet taratqanyn esterińizge salamyz.