Kásipqoı boksshy Qanat Islam bar sharýasyn ysyryp qoıyp qazaq boksshylaryn jattyqtyrýǵa kiristi, - dep habarlaıdy Qamshy.kz Qazaqparatqa silteme jasap.
«Endi sanaýly kúnde Rıo olımpıadasynyń alaýy tutanady. Ol jerde bir sportshynyń emes, búkil qazaq eliniń namysy synǵa túsedi. Sondyqtan, Rıoǵa baratyn baýyrlaryma kishkene bolsa da kómegim bolsyn dep sparrıng retinde AQSH-tan boksshylar shaqyrttym», - dep bastady áńgimesin Qanat Islam.
- Bul boksshylardyń elge kelýine siz jetekshilik ettińiz be? Qansha boksshy keldi?
- Mine, ózderińiz kórip turǵandaı, 7 boksshy keldi. Bul jeke meniń ǵana eńbegim emes. Boks federasıasynyń basynda otyrǵan aǵalardyń eńbegi. Ol kisiler maǵan «AQSH-tan óziń jattyǵyp júrgen jerden kásipqoı boksshylar tabyla ma? Jol shyǵynyn biz kótereıik, sen bizdiń boksshylarǵa sparrıng qarsylas bolatyn boksshylar bolsa qarastyryp kórshi» dep surady. Men kelisip, osy boksshylardy tabýǵa jol jasadym.
- Bul boksshylardyń bizdiń sportshylardan qandaı artyqshylqtary bar?
- Eshqandaı artyqshylyǵy joq. Bular kásipqoı rıngte júrgen boksshylar. Aıyrmashylyǵy sol ǵana. Bizdiń negizgi maqsatymyz - Olımpıada oıyndary Ońtústik Amerıkada ótkeli otyrǵandyqtan sol jaqtaǵy boksshylardyń bokstasý stılin kórsetý. Ár túrli boksshylarmen judyryqtastyryp, óz boksshylarymyzdyń sheberligin shyńdaı túsý.
- Bul boksshylardyń arasynda tıtýldyq beldikke ıe boksshylar da bar shyǵar?
- Árıne, bar. Barlyǵy da boks áleminde ózindik orny bar boksshylar. Qurlyqtyń arǵy betinen arnaıy shaqyrǵan soń nashar boksshylardy aldyrmaıtynymyz anyq.
- Ózińizdiń kezekti jekpe-jegińiz týraly aıta ketseńiz?
- Joǵaryda aıtyp ótkenimdeı, barlyq jeke sharýalarymdy ysyryp tastap, osy Rıoda óner kórsetetin boksshy baýyrlaryma kómektesip jatyrmyn. Bul Olımpıadada qazaq namysy synǵa túsedi. Sondyqtan, tamshydaı bolsa da, óz kómegimdi jasap, tájirıbemmen bólisip jatyrmyn. Al, óz jekpe-jegim týraly jaqynda biletin bolasyzdar. Qazir kelissózder júrip jatyr.
- Endi áńgimeńizdiń sońyn boksshy baýyrlaryńyzǵa degen jaqsy bir tilekpen aıaqtasańyz?
- Osynda el namysy úshin jattyǵýdan bas almaı, ter tógip jatqan barlyq jigitterge tek sáttilik joldas bolyp, osy mańdaı terleriniń óteýine jeńis tuǵyrynan qol bulǵap qaıtsyn degim keledi. Joldary bolsyn. Qazaq eliniń týyn bıikten jelbiretsin...
