«Endi «Odnoklassnıkı» áleýmettik jelisi arqyly Reseıden Qazaqstanǵa aqsha aýdarýǵa bolady» degen aqparat taraýda. Bul bizge qanshalyqty qajet edi?

Áleýmettik jelige engen bul jańalyq bizdiń elimizden basqa Ázirbaıjan, Armenıa, Belarýsıa, Germanıa, Grýzıa, Italıa, Izraıl, Baltyq jaǵalaýy elderi, Fransıa, Ózbekstan, Rýmynıa, Moldovaǵa da qatysty. Aýdarylǵan aqshany keıin MasterCard ı Maestro kartalary arqyly sheship alýǵa bolady eken.

Jalpy, aqsha aýdarý júıesi birqatar áleýmettik jeliler arqyly júzege asady. Ol – anaý aıtqandaı jańalyq ta emes. Tek, elimizde reseılik úlesi bar nemese sol elmen qarjylyq operasıalardyń túrli baǵdarlamalaryn júzege asyratyn bankter bola tura, mundaı júıeniń qoldanysqa enýi kúmán týǵyzady.

Onyń ústine elimizde reseıshil separatıstik pıǵyldaǵy toptar men jekelegen tulǵalardyń bar ekeni eshkimge jasyryn emes. Olardyń birqatary sot úkimimen qylmystyq jaýapkershilikke de tartylýda. Áleýmettik jeliniń bul áleýeti sondaı kúshterdi astyrtyn qarjylandyrýdyń bir quralyna aınalyp ketpeı me?