«Damý úshin áýeli beıbitshilik kerek. Ózara kelisim men halyqtardyń birligi kerek. Táýelsizdik jyldarynda bizdiń aýyzbirligimiz osy qaǵıdattarǵa súıenip, ornyqty. Búkil álem bizdi osy úshin qurmetteıdi. Qazaqstan halqy assambleıasynyń tájirıbesine qyzyǵýshylyq tanytyp otyrǵandar kóp. Bizdiń búgingi birligimizge qalaı qol jetkizgenimizdi bilgisi keletinder jeterlik. Eń aldymen, bárimiz de adambyz. Adamnyń qadir-qasıeti birinshi orynda turýy tıis. Adamdar birin-biri qadirleýi kerek. Kúlli álemdi ustap turǵan izgilik osy»,- dedi memleket basshysy Nursultan Nazarbaev Gaagadaǵy 3-shi jahandyq qaýipsizdik samıtiniń qorytyndylary boıynsha ótkizgen brıfıńte. Qazaqstan halqynyń tatýlyǵynyń talbesigi men turaqtylyǵynyń tutqasyna bolǵan Qazaqstan halyq assambleıasynyń (QHA) qurylǵanyna bıyl 19 jyl tolady. 19 jylda assambleıa qoǵamdyq birlestikten jalpyazamattyq ınstıtýtqa aınaldy. Bul ınstıtýt memleketke saıası, ekonomıkalyq jáne áleýmettik reformalardy sátti júrgizýge járdemdesti. Sonyń arqasynda, elimiz damýdyń dańǵyl jolyna tústi. Bul jerde eshkim de Qazaqstan halqy assambleıasynyń róli men mańyzyn joqqa shyǵara almaıdy. Kerisinshe, bul qurylym qoǵamdaǵy turaqtylyq pen kelisimniń irgetasyn nyǵaıtty. Elbasymyzdyń ózi aıtqandaı, «assambleıanyń tarıhy – el tarıhy, halyq tarıhy». Atap aıtarlyǵy, táýelsizdik jyldarynda elimizdiń tózimdilik pen qoǵamdyq kelisim modeli bizdiń shetelderdegi brendimizge aınaldy. Sonyń aıǵaǵy shyǵar, qazir kúlli álem Qazaqstandy kelisimniń, ózara dıalogtyń jáne mádenıetter men dinder tatýlyǵynyń mekeni dep sanaıdy. Bizdiń biregeı ozyq tájirıbemizdi dúnıe júzi moıyndap otyr. Otandyq telearnalardyń birine bergen suhbatynda Eýropalyq Odaqtyń Ortalyq Azıa boıynsha arnaıy ókili Patrısıa Flor bylaı depti: «Toleranttylyq pen senim-nanym bostandyǵy, eldiń ártúrli áleýmettik toptaryndaǵy jaǵymdy ultaralyq qarym-qatynastar – bulardyń bári osy memlekettiń erteńi úshin boı kóteretin beıbitshilik pen turaqtylyq mekeniniń kishkentaı kirpishteri. Al, Qazaqstan prezıdenti Nursultan Nazarbaevtyń, kúlli qazaqstandyqtardyń bul máselege erekshe mán berýiniń ózi álemde joǵary baǵalanady. Sebebi, tabysty mýltımádenı saıasat jáne Qazaqstan halyq assambleıasy sekildi biregeı biriktirgish organ qazir ártúrli mádenıetter men dinderdiń ómirindegi ámbetap eýrazıalyq modelge aınalyp ketti». Jahandyq konfesıaaralyq dıalogtyń qazaqstandyq tájirıbesin halyqaralyq uıymdar men sheteldik sarapshylar birazdan beri zerttep keledi. Bul oraıda, eýropalyq sarapshylar kópultty, kópkonfessıaly Qazaqstandaǵy ultaralyq kelisimdi, alýan túrli mádenıetter men dinderdiń ózara únqatysýyn beıbit ómir súrýdiń jahandyq etalony ekenin ádil baǵalady. – Meniń oıymsha, bul eldiń ıadrolyq qarýdan bas tartyp qana qoımaı, kúlli álemdi beıbitshilikke shaqyrǵan bastamasy, dinı kóptúrliligi men qoǵamynyń ashyqtyǵy ultty biriktirip keledi. Qazaqstan prezıdenti N. Nazarbaevtyń júrgizip otyrǵan saıasatynyń kóregendiligi men jetistigi osynda,- deıdi Ortalyq Azıa aımaǵy boıynsha tanymal sarapshylardyń biri Mıhael Laýbsh. Búgingi myń qubylǵan saıasattyń ózi Qazaqstannyń damýdyń durys jolyn tańdaǵanyn kórsetip otyr. Gaagadaǵy 3-ish jahandyq qaýipsizdik samıtinde Elbasy osy aıǵaqty taǵy bir rastady. – Qazaqstannyń syrtqy saıasaty tatýlyq pen kópvektorlyqqa, al ishki saıasatymyz árbir azamattyń tili, dini jáne mádenıetine qaramastan teńdigi men quqyqtaryn saqtaýǵa negizdelgen. Bul – búgingi zamanda turaqtylyq pen tynyshtyqty qamtamasyz etetin negizgi faktor. Memleket tek osyndaı qundylyqtardyń arqasynda ǵana qarqyndy damı alady. Endeshe, búgingi tańdaýymyz bizdiń elimizdegi saıasattyń durystyǵyn dáleldeýde,- dedi Nursultan Nazarbaev.