Atyraýda ótip jatqan jer komısıasynyń otyrysynda komısıa jetekshisi Asqar Myrzahmetov osylaı dedi. Bul týraly Qamshy.kz habarlaıdy.

QR Premer-Mınıstriniń orynbasary – Aýyl sharýashylyǵy mınıstri A.Myrzahmetov Komısıanyń óńirlerdegi jumysynda belgili bir prınsıpterdiń qalyptasqanyn, ıaǵnı, ashyq túrde eshqandaı shekteýsiz naqty kóterilip otyrǵan máselege baılanysty pikir aıtam degenderge shekteý bolmaıtynyn atap ótti.

«Biz bul jerge daýlasý úshin emes, jer men el taǵdyryn aqyldasý úshin jınalyp otyrmyz. Jer máselesin aqylmen, sabyrmen, jan-jaqty talqylaý arqyly qarap, shoǵyrlanǵan túıindi máselelerdi sheshýdiń jaqsy úlgisin kórsetýimiz qajet», - dedi Komısıa tóraǵasy.

Kún tártibinde aldyńǵy qozǵalǵan tarmaqtardyń zańdy jalǵasy retinde úsh másele qaralady:

Birinshiden, aýyl sharýashylyǵy jerlerin qazaqstandyqtarǵa jalǵa berý ınstıtýtyn jetildirý. Onyń ishinde, jerdi utymdy paıdalanýǵa baqylaýdy kúsheıtý, jerdi jalǵa berý rásimderiniń ashyqtyǵyn, tıimdiligin arttyrý, bir qolǵa jalǵa beriletin jerlerdiń shekti (eń joǵary) mólsherin belgileý, Qazaqstan Respýblıkasynyń shekaralas aýmaqtarynan beriletin aýyl sharýashylyǵy jerlerin paıdalaný tártibin kúsheıtý.

Ekinshiden, eldi meken mańaıynan jergilikti turǵyndardy qajetti jaıylymdyq jerlermen qamtamasyz etý júıesin qalyptastyrý

Úshinshiden, moratorıı jarıalanǵan 2 máselege (qazaqstandyqtarǵa jeke menshikke jáne sheteldikterge jalǵa berý) baılanysty pikir almasý kózdelip otyr.