Birde Jezqazǵanǵa barǵanymda ondaǵy dostarymnyń biri qala turǵyndary «saqaltaılar» dep at qoıyp, aıdar taqqan salafıt jastardyń sportqa, jaýyngerlik daıyndyqqa asa mán beretini týraly órbigen áńgime arasynda olardyń qaladaǵy peıntbol ortalyǵynyń turaqty klıentteri ekenin aıtyp qaldy.
«Aptasyna birneshe ret peıntbol alańdaryn jalǵa alady. Toptaryna bóten adamdy kirgizbeıdi. Tek ózderi jınalyp baryp, alańdy birneshe saǵatqa ıelenedi. Ózgelermen birlesip «soǵysýǵa» qulyqsyzdyq tanytady, bóten adamdardyń alańǵa kirgenin qalamaıdy», - dep qalǵany bar. Sol sóz sol aıtylǵan jerinde qalyp, sol sátte asa mán bermegenim ótirik emes. Tipti, «Zeınetaqy qoryna aqsha aýdarý – haram, Eńbek kodeksi – sharıǵatqa qaıshy» dep, eńbek zańnamalaryna saı turaqty mekemelerde jumys isteýden qashqaqtaıtyn keı «dindárdiń» jarylǵysh zattar paıdalanylatyn shahtalar men qarý-jaraqpen tikeleı baılanysty kúzet qyzmetterinen bas tartpaıtyny, álgindeı «sharıǵı tyıymdardy» umytyp ketetini de oılandyrmapty sol kezde...
18 shildede Almatyda bolǵan oqıǵa radıkaldy jastardyń áleýmettik portreti týraly qaıta oılanýǵa sebep bolǵany anyq. Olardyń ne úshin radıkaldanatyny, memlekettik júıe men zańdarǵa qarsy turatyny, zaıyrlylyq prınsıpteri men zaıyrly ómir saltyn ustanatyn jandarǵa qaskóıligi emes oılandyrǵan. Oılandyrǵany, jalǵyz adamnyń sanaýly mınýttar ishinde qanshama adamdy óltirip, jaraqattaǵany. Qarýly qaqtyǵystardy bylaı qoıyp, áskerde merzimdik qyzmetin ótemegen adamnyń álgindeı sheberlik kórsetýi shynymen oılandyrady. Kóp adamnyń kókeıinde áli kúnge osy suraq júrgeni anyq.
Qazir Almatyda qandy qyrǵyn uıymdastyrǵan Rýslan Kúlikbaev tergelip jatyr. Birqatar aqparat quraldary aıyptalýshynyń tergeýde aıtqan sózderin jarıalaýda. R. Kúlikbaevtiń tergeýshilerge aıtqan keı sózin jaqynda «Vremá» gazeti de jarıalady. Almaty qalasy Almaly aýdandyq İİB-ge ol bir tapansha, bir sholaq myltyqpen barǵanyn aıtypty.
«Bala kezimde men kıkboksıńpen aınalystym, oryn almasam da oblystyq jarystarǵa qatysyp júrdim. Áskerde bolmadym, biraq, ańshylyqpen áýestendim. Odan bólek peıntbolmen kásibı túrde shuǵyldandym. Men shynymen sýdıalardan, polısıa men prokýrorlardan ósh alǵym keldi. Ózimniń úkimim obektıvti boldy dep sanamaımyn. Birinshi Almaly aýdandyq sotyna bardym, biraq ol jaqta forma kıgen eshkimdi kezdestirmedim. Odan Almaly AİİB-ge bardym da posttan jańa ǵana shyqqan adamdy attym...Sosyn basqa polıseılerge oq jaýdyrdym. Beıbit adamdardy atpadym. Jezókshege keler bolsaq, men oǵan jáne basqalaryna da kásipteriniń, ásirese, Ramazan aıynda haram ekenin eskerttim. Men olarǵa jezókshelikti Alla qalamaıtynyn eskertsem de olar tyńdamady. Sosyn men ony attym. ...Makarov tapanshasy men sholaq myltyqty kósheden taýyp alǵam, qaı kóshe ekeni esimde joq...», - deıdi R. Kúlikbaev tergeý barysynda.
R. Kúlikbaevti qansha jerden dinge qatysy joq, onyń áreketin ádettegi bandıtızm deýge tyrysqanmen onyń osy sózderi alǵashqy adamdy (jezóksheni) dinı kózqarasyna baılanysty óltirgenin rastaıdy. Eń bastysy ol atý daıyndyǵyn «peıntbolmen kásibı túrde shuǵyldaný» arqyly shyńdaǵanyn moıyndap otyr. Shynymen de nysanany dál kózdep, ózine oq tıgizbeı urys jasaý úshin qalada basqa qandaı jerde daıyndalýǵa bolady? Aıyptalýshynyń aıtqanyna senbeske shara joq.
Sonymen, 18 shilde kúni Almaty qalasynda 5 adamdy óltirip, 7 adamdy jaralaǵan (jaralanǵan bir polıseı kelesi kúni kóz jumdy – red.) R. Kúlikbaev peıntbol ortalyǵyna jıi baryp turǵan. Peıntbol – birneshe adam qatysatyn toptyq oıyn. Demek, R. Kúlikbaev jalǵyz emes...
Darhan Muqantegi
