«Mońǵolıadaǵy tasqynnan zardap shekkenderge arnap qazaqstandyq belsendiler salǵyzyp jatqan keıbir úıler «qaýipti zonada turǵandyqtan» buzylatyn boldy» dep jazady Azattyq. Bul týraly Qamshy.kz habarlaıdy.
Mońǵolıanyń Baıan-Ólgıı aımaǵynyń turǵyny Saıran – segiz balanyń anasy, jalǵyzbasty áıel. Otbasyn qurǵan úlken tórt balasy Qazaqstanǵa kóshken. Kámeletke tolmaǵan tórt balasymen Ólgıı qalasynda turady. Shildeniń 10-ynda bolǵan tasqynnan soń Saırannyń úıi jaramsyz bolyp qalǵan. Apattan keıin Qazaqstanda azamattyq belsendiler áleýmettik jeli arqyly jurttan qarjy jınap, turmysy nashar bes úıge baspana salyp berýdi uıǵarǵan. Solardyń qatarynda Saırannyń shańyraǵy da bar.
- Úıdiń irgetasyn quıyp, kirpishterin qalaǵan bolatyn. 50 paıyzy bitip turǵan edi. Endi kelip, ákimshilik qyzmetkerleri: «Úıdi buz. Zańsyz jerge salynǵan» dep jatyr, - deıdi Saıran.
«PARTIA TARTYSY BOLÝY MÚMKİN»
Qazaqstandyq belsendiler jınaǵan aqshanyń bólinip, jumsalýyn qadaǵalap júrgen baıan-ólgıılik belsendi Aıdos Azat:
- O basta ákimshilik ózi belgilep bergen jerge úı salynǵan. Biraq bul jerde partıa tartysy bolyp jatýy múmkin, - dep boljaıdy.
Baıan-Ólgıı aımaǵyndaǵy 200-ge jýyq úıdi sý shaıyp, 700 turǵyn baspanasyz qalyp jatqan kez Mońǵolıadaǵy parlament saılaýymen tuspa-tus kelgen edi. Sol kezde bılik basynda otyrǵan Demokratıalyq partıa ókilderi tasqynnan zardap shekken 100 úıge jańadan baspana salý úshin jer bólgen. Jergilikti turǵyndardyń aıtýynsha, burynǵy bılik basynda otyrǵan Demokratıalyq partıa jeńilip, ornyna kelgen Mońǵolıa halyq partıasy jer bólý sheshimin zańsyz dep tapqan.
- Qazaqstannan kelgen jigitter (belsendiler – red.) basynda qansha qarjy ákelgenin aıtty. Oılana kele «jaǵdaıy joq bes otbasyǵa úı salyp bereıik» dep sheshim qabyldady. Qazir úsh úı salynyp bitýge taıap qaldy. Eki úı endi bastalyp, salynyp jatyr. Biraq [jergilikti bılik] basynda kórsetip bergen jerlerin endi «durys emes» (zańdy ýchaskege túspegen – red.) dep, sonyń saldarynan eki úıimiz buzylǵaly jatyr. Bul endi basyndaǵy basshylyqtyń teristigi, - deıdi Aıdos Azat.
Ózin tek Asqar dep tanystyrǵan Baıan-Ólgıı aımaq ákimshiliginiń qyzmetkeri Azattyqqa jer ýchaskeleriniń ne sebepti jaramsyz dep tanylǵanyn túsindirdi.
- Aeroportqa tym jaqyn, qaýipti zonaǵa kirip ketken. Buny elektr júıesin tartý kezinde kórip, úı salýdy toqtatý jóninde sheshim qabyldanǵan, - dedi ol.
Biraq Asqar naqty qansha úıdiń qaýipti zonaǵa kirip ketkenin aıtyp bere almady.
JAŃA ÁKİMNİŃ JAÝABY
Úısiz qalǵan Saıran jańa ákimniń bólip bergen jerine kıiz úımen kóship barǵanyn, jartylaı salynǵan úıiniń turǵanyn, ony buzyp ákep qaıta salýǵa qarjysynyń joq ekenin aıtady.
Baıan-Ólgıı aımaǵynyń ákimi Ǵylymhan Aıypuly 20 úıdiń qaýipti aımaqqa kirip ketkenin rastady.
- Úkimet aýysyp, aldyńǵy kisiler (áýelgi basshylar – red.) kóp mán bermeı, sheshilmegen máselelerge aralasyp, kirisip jatyrmyz. Qyzmetke kelgeli bir apta bolǵan. Komısıa qurylyp, tekserilmegen. Jıyrmadaı úıge berilgen jer aeroportqa jaqyn. Samolettiń ushyp-qonýyna keri áserin tıgizedi degen mamandar qorytyndysy shyqqan. Sol boıynsha ol 20 úıge basqa jerden jer bólinip berildi, - deıdi aımaqtyń jańa ákimi.
Ǵylymhan Aıypuly da Azattyqqa «qaýipti zonaǵa» naqty qansha úıdiń salyna bastaǵanyn anyqtap aıtyp bere almady.
Aımaq ákimi úkimet tarabynan 100 otbasyǵa kıiz úı taratylǵanyn habarlady. Elektr jaryǵyn tartý jáne úsh-tórt jerden qudyq qazý máselesin qarastyryp jatqanyn aıtty. Azattyq tilshisiniń «Úılerin jartylaı salyp qoıǵan turǵyndardyń shyǵynyn kim ótep beredi?» degen saýalyna «Bilmeımin» dep qysqa qaıyrdy.
Qazaqstandyq belsendi Aıatjan Ahmetjannyń bastaýymen áleýmettik jeli qoldanýshylary Baıan-Ólgııdegi tasqynnan zardap shekkenderge kómektesý maqsatynda qarjy jınaǵan bolatyn. Belsendi Azattyqqa jınalǵan 2 mıllıon 500 myńǵa jýyq qarjyny Baıan-Ólgııge jetkizip, bes otbasyna 32 sharshy metrlik baspana turǵyzyp berýge kiriskenderin aıtty. Budan basqa, Qazaqstan bıligi Baıan-Ólgııdegi tasqyn sýdan zardap shekkenderge arnap 200 myń AQSH dollaryn bólgen bolatyn.
