Bul týraly Almatyda ótken Adam quqyǵy jónindegi halyqaralyq búronyń baspasóz máslıhatynda aıtyldy, - dep habarlaıdy Qamshy.kz.
LA-155/18 mekemesinde Natalá Slekıshınany zorlaý oqıǵasyna qatysty shýdan soń quqyqqorǵaýshylarǵa osyndaı taǵy basqa zań buzýshylyqtar belgili bolǵan kórinedi. Dál sol mekemede taǵy eki áıeldiń júkti bolǵandyǵy anyqtalǵan.
«Ulaǵatty otbasy» qorynyń prezıdenti Marıanna Gýrına sottalǵan áıelderden kóp jaǵdaıǵa qanyqqanyn aıtady. Onyń aıtýynsha, ızolátor jyn oınaqqa aınalǵan. Erkekter
aqshasyn tólese unatqan áıelderine kirip, kezdese alatyn kórinedi.
«Mekeme jezóksheler úıine aınalyp ketken. Belgili-bir jeńildikterge ıe adamdar jynystyq qatynasty qajet etse, olarǵa sondaı kezdesýler jasap beredi», - deıdi ol.
Advokat Aıman Omarovanyń aıtýynsha, N. Slekıshına túrmede ıntımdik baılanysqa túsýdi qalamaǵan, sondyqtan ony zorlaǵan. Qazirgi ýaqytta onyń isi sotqa jiberilgen. Advokat iske qatysy bar delingen mekemeniń barlyq tórt qyzmetkeri de qylmystyq jaýapkershilikke tartylýyn talap etip otyr. Sondaı-aq, ol arnaıy mekemede áıel zorlaýdyń basqa da oqıǵalary zerttelip, anyqtalýy tıis dep sanaıdy.
«Biz LA-155/18 mekemesin Ermek Omarbekov basqarǵan jáne N. Slekıshınany zorlady dep aıyptalǵan Rýslan Hakımov qyzmet etken ýaqyttaǵy basqa da qamaýǵa alynǵandardyń tekserilýin talap etemiz», - deıdi A. Omarova.
Tanymal quqyqqorǵaýshy Evgenıı Jovtıs te túzeý mekemelerindegi bul jaǵdaıǵa atústi qaraýshylyq baıqalatynyn aıtady.
«Bul is kolonıalarda qaýipsizdiktiń qamtamasyz etilmegenin kórsetedi. Bul is erekshe baqylaýǵa alynyp, aıaǵyna deıin jetý kerek. Atalǵan oqıǵada prokýratýranyń da dármensizdigi belgili bolyp qaldy. İs prokýratýraǵa túsisimen birden sotqa jóneltildi. Eshqandaı zertteý, tekserý júrgizilmedi», - deıdi ol.
Buǵan deıin joǵaryda atalǵan mekemede qamaýda bolǵan N. Slekıshınanyń zorlanǵandyǵy týraly jazǵan bolatynbyz.
