«Rýlas jigitti unatyp, jan men ar azabyn tartyp sharshadym» degen boıjetken syrymen bólisti, - dep jazady Qamshy.kz.

«Bir kúni mendegi shydam shegine jetti. Bar erik-jigerimdi jınap, oǵan habarlastym. Ekeýimiz kezdesip, uzaq syrlastyq. Onyń da mende kóńili baryn bildim. Endi ǵana jarasyp, baqytty bolamyz degen qýanyshymyz eki saǵatqa ǵana sozyldy.

Eki saǵat...

Sosyn bári bitti...»

Osylaı degen Gúlim ózimen rýlas jigitpen qalaı baılanysqanyn aıtyp berdi.

Almatylyq Gúlim esimdi boıjetken  «aqyl toqtatyp, es bilgeli bolashaǵymdy sanaly azamatqa tapsyryp, sanaly urpaq tárbıeleýdi jıi oılaıtynmyn» deıdi. Sol sebepti de kóldenen jolyqqan kók attyǵa burylyp qaraı bermepti.

-Osydan birneshe jyl buryn «meni jáne balalaryn» aıalaı alady-aý degen jigitti jolyqtyrdym. Anyǵynda ony ómirde bir-aq ret kórgenmin. Kórgen kezde mán bermegenimmen,  keıin ol adam týraly jıi oılaıtynmyn. Qaıda júrgeni, ne istep jatqany qyzyqtyratyn. Ózinen suraýǵa batylym barmaı talaı ýaqyt joǵalttym. Ony shynymen bolashaqta «joldasym osy jigit bolsa eken» dep qıaldaıtyn boldym, - deıdi Gúlim.

Tanystyqtan soń, birneshe jyldan keıin ǵana aralasa bastaǵan eki jas jıi bolmasa da, anda-sanda qal surasatyn kúnge jetipti.

Gúlimniń aıtýynsha, ózin aıttyrýshylar, qolyn suraýshylar, usynys jasaýshylardyń sany artqan. Biraq kóńili men búıregi álgi jigitke buryp turypty.

Aradaǵy syr ashylyp, eki jas kezdesýge sheshim qabyldaıdy. Birge tamaqtanyp, biraz serýendep, uzaq syrlasady. Al áńgime arasynda ekeýi bir rýdyń adamdary ekenin biledi.

-Ekeýimiz de únsiz taǵy bir saǵat otyrdyq. Sosyn ol jáı ǵana úıińe jetkizip salaıyn dedi de, úı aldyna kelgende «joǵalyp ketpe. Biz endi burynǵydan da jaqyn jandarmyz. Aǵasy men qaryndaspyz» dedi. Men únsiz bas ızedim. Sodan beri bir-birimizge habarlaspaımyz. Biraq  jan men ar azaby janymdy jegideı jep barady, - deıdi boıjetken.

Qanshama ýaqyt sezimderin aıtýǵa aba almaı, ishteı tynǵan eki jas endi tabysqanda belgili bolǵan syr, ekeýin de eseńgiretip jibergen.

-Otyra qalyp jeti atamyzdy sanastyq. Jeti atamyzdan sáıkes  kelmeıdi, tipti 13-14 ata aryda jatyr eken, - deıdi Gúlim.

Syrynyń jet shaǵasyn anasyna aıtsa, ol «bizdiń rýda bir-birimen qyz alyspaıdy» dep qysqa qaıyrypty.

Qazaqta bir rýdyń adamdary tós qaǵystyryp, quda bolmaıdy. Bul qyz alyp, qyz berisýde asa mán beriletin másele. Bir rýdyń adamdary eshqashan qyz alysyp, qyz berisken emes. Bir rýdyń qyz-jigiti bir-birine aǵa-qaryndas bolyp qala bermek.  Bul ádette urpaqtyń qany men deni saý, durys bolýy úshin jasalatyn amal ekeni anyq.

Degenmen bir rýdyń adamy bolsa da, jeti atadan asqan soń qyz alysa beretin rýlar da bar.

Indıra Qýat