UQK jemqorlyq daýyna baılanysty Qorǵanys mınıstrliginde aýqymdy tekseris júrgizip jatyr, - dep habarlaıdy Qamshy.kz KTK arnasyna silteme jasap.

Qorǵanys mınıstrliginde iri jemqorlyq daýy. Ulttyq qaýipsizdik komıteti Qorǵanysqa bólingen búdjet qarjysyn urlaýmen aınalysqan qylmystyq topty ustady. Arnaıy qyzmet  mınıstrliktiń  materıaldyq-tehnıkalyq qamtamasyz etý bas basqarmasy bastyǵynyń orynbasary T. Jumqazıevtiń qolyna kisen salǵan.  

Quzyrly organdaǵy málimet boıynsha, podpolkovnık memleketttik tenderdi maıshelpekke aınaldyrǵan. Ol  konkýrstyq komısıanyń tóraǵasy bolyp, kásipkerlermen aýyz jalasypty. Iaǵnı qorǵanys mınıstrligine kerekti qarý-jaraq sıaqty tehnıkany satyp alýǵa bólingen qazyna qarjysyn sybaılastarymen birigip jegen. Bul oıyn júzege asyrý úshin Qorǵanys pen Qarjy mınıstrligindegi shendilerdi qylmystyq isine qosqan. Tipti 8 tamyzda podpolkovnık T. Jumqazıev 20 mıllıon teńge para alyp jatqan sátinde quryqtalǵan. Onymen birge Qorǵanys mınıstrliginiń 5 laýazymdy qyzmetkeri men 4 bıznesmenniń qolyna kisen salynypty.

UQK baspasóz qyzmeti búgin qorǵanys mınıstrliginde qarjy jymqyrýdyń qupıa sqemasy áshkere bolǵanyn habarlady. Shýly is osy tutqyndaýlarmen shektele me, álde laýazymdy basqa da shendiler kúdikke iline me ol jaǵy ázirge belgisiz.

Al, atalǵan tutqyndaýlarǵa qatysty pikir bildirgen Qorǵanys mınıstrligi ótken jyldyń qarasha aıynda mınıstrlik pen Bas prokýratýra, Ulttyq qaýipsizdik komıteti, Jemqorlyqqa qarsy is-qımyl jáne memlekettik qyzmet isteri jónindegi Agenttik, İshki ister mınıstrligi arasynda jemqorlyqpen kúres jónindegi memorandým jasalǵanyn, vedomstvo basshylyǵy qazyna qarajatyn tonaýshylarmen aıaýsyz kúres júrgizýge múddeli ekendigin jarıalady.