Aqtóbede jat aǵymnyń jeteginde ketkender jappaı jumysqa ornalastyrylýda, - dep habarlaıdy Qamshy.kz 31-arnaǵa silteme jasap.
Aqtóbede jat aǵymdaǵylardy jappaı jumysqa turǵyzý naýqany bastaldy. Jergilikti bılik dástúrli dinnen teris aınalǵandarmen endi osylaı kúrespek. Qazirdiń ózinde Aqtóbe oblysy boıynsha ǵana myń jarym adam radıkaldanýǵa beıim maqsattaǵy toptardyń tiziminde tur. Olardyń bárin jumyspen qamtýǵa ákimdiktiń shamasy jete me? Jáne qandaı jumys ornyn usynbaq?
Aqtóbedegi 5 maýsymdaǵy terakttan keıin jergilikti bılik jan-jaqty oılanǵandaı. Aqtóbedegi barlyq jat aǵymdaǵylardyń betin qaıtaryp, olardy jumyspen qamtýdy qolǵa aldy. Bul bastamanyń qanshalyqty nátıjeli bolary ázirge belgisiz. Óıtkeni, din ókilderiniń aıtýynsha búgingi kúnge deıin ýlanǵan sanany birden qalpyna keltirý ońaı emes.
ASLANBEK TYNYSHTYQOV, «Ańsar» aqparattyq taldaý ortalyǵy basshysynyń orynbasary:
- Teris dinı baǵytta júrgen azamattardyń basym kópshiligi memlekettiń tarapynan usynylatyn osyndaı kómekterden bas tartady. Osy ýaqytqa deıin biz olardy Aqtóbe qalalyq ishki saıasat bólimi men jumyspen qamtý ortalyǵyna aparyp, suhbattasyp, áıel jamaǵattar men er jamaǵattarmen sóılesip, sol jumysqa ornalasýǵa múmkindik bar ekenin ,sontaı tetikterdiń qarastyrylǵanyn bizdiń tarapymyzdan aıtyp túsindirdik.
Aqtóbedegi din mamandary men teologtar dál qazir osy sharýamen aınalysýda. Tek qala emes, oblys aýmaǵyndaǵy aýdandarǵa baryp, teris aǵym jetegindegilerdi raıynan qaıtarýǵa tyrysyp jatyr. Mamandardyń aıtýynsha olardy jumysqa turǵyzýdyń ózi qıyn másele. Óıtkeni olar taksı qyzmeti, ustalǵan uıaly telefondardy satý jáne jóndeý, qurylys jumystary sıaqty jeke kásiptermen ǵana aınalysady. Al ázirge jat aǵymda júrgen myń jarym adamnyń tek 35-i ǵana mamandardyń kelissóz júrgizýi arqasynda Aqtóbe qalalyq jumyspen qamtý ortalyǵynnyń tizimine ilinip, jumysqa ornalasqan.
GÚLSHAT QAŃTARBAEVA, Aqtóbe qalalyq jumyspen qamtý ortalyǵynyń dırektory:
- Sol 35 adamnyń ishinde 10 adam qazirgi tańda turaqty jumysta, 12 adam beıresmı jumysta júrgender, 10 adamnyń ishinde endi kóbinese tehnıkalyq mamandyq boıynsha jumysqa ornalasqan azamttar, eki áıel adam olar bala kútiminde otyr. Endi naqty jumys qajet etetin 4 azamatymyz bar.
Aqtóbedegi bul naýqan teris aǵymdaǵylardyń sanyn azaıtýǵa qanshalyqty kómegin tıgizeri belgisiz. Anyǵy, jat dinge bet burǵandardy raıynan qaıtarý ázirge ońaı bolmaı tur. Oǵan qosa jumys berýshiler de saqaldy erkek pen betin tumshalaǵan áıeldi jumysqa qabyldaǵylary kelmeıdi.
