Áıgili ánshi Ámire Qashaýbaev týraly jazýshy Júsipbek Aımaýytovtyń «Ánshi» dep atalatyn áńgimesi bar. Osy áńgime Ámireniń ánshiligin, adamı bolmysyn, ortasyn jan-jaqty jarqyrata ashqan ádebı eskertkish. Qalyń jurt Ámireni áýeli «Ánshiden» tanyp edi. 1925 jyly Parıjde ótken óner jármeńkesinde qazaq ánin álemge tanytyp, Eýropanyń tańdaıyn qaqqyzyp tańǵaldyrǵan Ámire beınesi endi halyqaralyq kınoekranǵa shyqpaq. Qazirgi kezde túsirilimi júrip jatqan bul kınokartına 2017 jyly úlken ekranǵa shyǵady dep josparlanyp otyr. Kıno jobanyń aty «Ámire». Kıno - Mádenıet jáne sport mınıstrligi tapsyrysy boıynsha «Qazaqfılm» kınostýdıasy jáne ınvestor, kınoprodúser Alıdar Ótemuratov qatysýymen Qazaqstan men AQSH-tyń birlesip túsirgen alǵashqy týyndysy bolmaq.
«Ámire» fılmin amerıkalyq rejıser Djef Vespa túsirip jatyr. Senarı avtory - Benjamın A. van der Vın. Bizdiń kıno salasyna sheteldik kınogerlerdiń aralasýymen túsirilgen fılmder barshylyq. Alaıda, bári sátti shyqty, tabys tapty, kórermen qyzyǵýshylyǵyn týdyrdy dep aıtýǵa kelmeıdi. Biraq, biz sóz etip otyrǵan fılmge M.Áýezov atyndaǵy Qazaq Memlekettik drama teatrynyń úsh birdeı akteryna negizgi rólder berilgen eken. Olar: Erkebulan Daıyrov, Almas Shaıahmetov jáne Orazhan Kenebaev. Kınodaǵy basty róldi akter Sanjar Mádıev oınaıdy.
Fılmniń boıaýy qanyq, qurylymy men oqıǵa jelisi amerıkalyq rejıser men senarısttiń kásibı sheberlikterine túser syn bolǵanymen, Eýropaǵa qazaq daýysyn, qazaq ánin jetkizip, sonymen kúlli álemdi qazaq ániniń qudiretine uıytqan Ámire jaıly fılmdegi ánshi jáne onyń ómiri arqyly beriletin ulttyń minezi, arman-maqsaty, mádenıeti, dúnıege kózqarasy osynyń bárin joǵaryda aty atalǵan akterlar meılinshe jarqyratyp kórsete alatynyna senim mol. Óıtkeni, qazaq bolmysy – qazaq akteriniń qanynda bar. Akterlerdyń ishinde Erkebulan Daıyrovqa Mustafa Shoqaıdyń róli berilgen. Ámireniń Eýropaǵa saparyndaǵy Mustafa Shoqaıdyń orny erekshe ekeni belgili. Ánshi keıin elge oralǵan soń, Shoqaımen kezdesýiniń saldarynan qyzyl ókimet tarapynan qysym kórgeni de málim. Sondyqtan, Mustafa beınesi fılmdegi eń sheshýi ári burylystarǵa toly sátteri bolady dep oılaımyz. Al, Erkebulan uly maqsattar jetegindegi Shoqaıdyń emıgrasıadaǵy ómiriniń Ámiremen jolyǵý sátterin, onyń ánshi taǵdyrynda qaldyrǵan izin tereń sezine otyryp, jetkize alady. Sebebi, buǵan deıin Qazaqstan kıno synshylary tarapynan oń baǵa alyp, 37 shi Máskeý halyqaralyq kınofestıvalinde úzdik er adam roli nomınasıasyn ıelengen. Ári rejıser Aqan Sataevtyń «Baýyrjan Momyshuly» fılminde de basty róldi oınap, batyrdyń obrazyn óte jaqsy alyp shyqqany jáne bar. Demek, Daıyrov óz «Ámire» fılminde óziniń kıno akterlyq talantynyń taǵy bir qyryn este qalarlyqtaı etip kórsetetinine kúmán joq.
Fılmdegi taǵy bir aıshyqty beıne – Jumat Shanın. Shanınniń kıno obrazyn Almas Shaıahmetov somdaıdy. Jumat Shanın qazaq teatr óneriniń negizin qalaýshy tulǵa. Ómiri teatrynyń óneriniń bastaýynda turǵan tulǵanyń beınesin somdaý teatr akteri úshin asa qıynǵa túspesi anyq. Akterlardyń rólderine qarap otyryp, fılmde ótken ǵasyrdyń birinshi shıregindegi qazaq óneri men mádenıeti ári qoǵamdyq-saıası júıesi kórinis tabatynyn ańdaý bolady.
Fılmniń halyqaralyq prokatqa shyǵarylatyny áý basta aıtylǵan. Eger kınokartınanyń prokaty sátti júrse, onda fılmge túsken akterlardyń da aldynan úlken jol ashylatyny sózsiz.
